“Issa rridu nibdew niġbru l-punti” - Alonso

Is-sewwieq tal-Ferrari, Fernando Alonso qal li l-Ferrari, issa, jridu jiġbru l-punti jekk beħsiebhom jissieltu għar-rebħ tat-titlu. Fi tmiem il-ġimgħa jsir il-ħames Grand Prix tas-Sena, dak fi Spanja u s'issa l-Ferrari irnexxielhom jirbħu biss darba, meta l-istess Alonso issorprenda lil kulħadd u rebaħ il-Grand Prix tal-Malasja.

 

Waqt it-testijiet li saru matul dawn l-aħħar jiem f'Mugello l-Ferrari għamlu tibdil kbir fil-karozza u issa jistennew li dawn it-tibdil jagħtu r-riżultati mixtieqa. “Fl-ewwel erba' Grand Prix konna bejn wieħed u ieħor 0.9 sekondi wara dawk li spiċċaw l-ewwel u jekk rridu nirbħu t-titlu rridu nnaqsu dan id-distakk minnufih,” qal Alonso. 

 

Minkejja li l-karozza tal-Ferrari ġiet kritikata, Alonso ġie mfaħħar għal wirjiet li kellu dan l-istaġun u attwalment dan jinsab fil-ħames post fil-klassifika tas-sewwieqa, 10 punti taħt il-leader u ċ-champion Vettel tar-Red Bull. “Hu veru li f'Mugello l-affarijiet dehru aħjar imma tajjeb ngħidu li ma sarux mirakli u l-partitarji m'għandhomx jistennew li se nirbħu f'Barċellona. Il-Grand Prix ta' Barċellona se jkun l-ewwel tarġa, filwaqt li rridu nitjiebu fiż-żewġ Grand Prix ta' wara, dak tal-Kanada u ta' Valencia,” kompla jgħid is-sewwieq Spanjol.

 

Ta min jinnota li waqt it-testijiet li saru f'Mugello, l-McLaren kienu l-uniku tim li ma użawx is-sewwieqa tagħhom Hamilton u Button. Minflok, dawn taw ċans lil Gary Paffett u lil Oliver Turvey biex jipprovaw il-karozzi. Tim ieħor li tejjeb il-karozza tiegħu waqt dawn it-testijiet kienu r-Red Bull filwaqt li l-Lotus ħadmu ħafna biex itejjbu r-roti.