Twissija li l-Hezbollah għandha għajnejha fuq l-Ewropa

Daniel Benjamin, il-koordinatur għal kontra t-terroriżmu tad-Dipartiment tal-Istat, wissa li l-grupp militanti tal-Hezbollah għandu għajnejh fuq l-Ewropa, u mhux eskluż li jipprova jwettaq xi attentat terroristiku.

Hu qal li l-indikazzjonijiet huma li l-Hezbollah u l-Iran se jkomplu jżommu livell għoli ta’ attività terroristika fil-ġejjieni qrib. Benjamin żied li l-Hezbollah għandu preżenza fl-Ewropa u l-attività riċenti tal-grupp turi li mhux se jżomm lura minħabba t-tħassib tal-vittmi innoċenti jew il-kundanna politika.

Hu żied li l-kalkolu tas-servizzi sigrieti Amerikani hu li l-Hezbollah kapaċi jidħol fl-azzjoni fl-Ewropa jew x’imkien ieħor fid-dinja fi kwalunkwe ħin u bi ftit li xejn twissija.

It-twissija saret hekk kif l-Istati Uniti imponiet sanzjonijiet ġodda kontra l-Hezbollah, li hu bbażat fil-Libanu.

Benjamin wissa li l-Hezbollah jista’ jsir aktar vjolenti hekk kif is-sanzjonijiet jibdew iħallu l-impatt fuq is-Sirja u l-Iran, żewġ pajjiżi li jappoġġaw lill-Hezbollah.

L-uffiċjal Amerikan qal li ma jemminx li l-grupp hu attiv fl-Istati Uniti, iżda l-grupp żied l-attività tiegħu madwar id-dinja.