maltarightnow.com
19 t' April, 2012
19:34 CET |
L-Indja wettqet prova ta' missila bil-kapaċità li ġġorr materjal nukleari u li tista' twassal sa Beijing, fiċ-Ċina, u wkoll sal-Ewropa tal-Lvant.
L-awtoritajiet fissru din il-prova bħala waħda li mxiet mingħajr intoppi u dan ifisser li l-Indja issa ssieħbet mal-'klabb' żgħir ta' pajjiżi li jistgħu jistazzjonaw il-missili ballistiċi b'warheads nukleari għal fuq distanzi kbar.
Intant, u minkejja li l-Uffiċjali Indjani jiċħduha, l-azzjoni x'aktarx kienet intiża bħala 'deterrent' għaċ-Ċina. Il-Prim Ministru tal-Indja, Manmohan Singh, awgura lix-xjenzjati li ħadmu fuq il-proġett għas-suċċess tal-prova.
Il-filmati wrew il-missila, tat-tip Agni-V li twassal fuq distanzi ta' aktar minn 5,000 kilometru, tifred is-sħab fl-aktar mumenti drammatiċi tal-prova li seħħet kmieni lbieraħ mill-Gżira ta' Wheeler, lil hinn mill-kosta tal-Istat Indjan ta' Orissa, lejn il-Lvant. L-Agni-V hi magħmula kważi għalkollox mill-Indjani u titqies bħala 'l-ġawhra' ta' programm li jaħseb primarjament għat-theddida potenzjali miċ-Ċina.
Sadattant, il-Gvern Indjan jgħid li l-missila m'għandhiex tiffunzjona fuq bażi uffiċjali qabel tal-anqas sentejn oħra. Dan meta llum jaħsbu li huma biss l-Istati Uniti, ir-Renju Unit, Franza, ir-Russja u ċ-Ċina – ilkoll membri permanenti tal-Kunsill tas-Sigurtà tan-Nazzjonjiet Uniti – flimkien ma' Iżrael li għandhom il-kalibru ta' arma partikulari.
Fl-istess ħin, l-Indja, li qed tiżviluppa malajr bħala ġgant tal-ekonomija, hi ħerqana għal rwol akbar fil-komunità internazzjonali u ilha b'ambizzjonijiet għal siġġu permanenti fuq il-Kunsill tas-Sigurtà tan-NU. Hu minnu wkoll li dan il-pajjiż, fis-snin reċenti, sar l-akbar importatur ta' armi fid-dinja meta qed idaħħal aktar tagħmir avvanzat għal militar li minkejja li hu kbir fid-daqs jeħtieġ li jaġġorna ruħu fid-diversi setturi tiegħu.
|
sezzjoni: internazzjonali
Ċentri tas-saħħa
