Terġa' tinfetaħ it-triq George Borg Olivier

Il-President tal-Kamra tal-Kummerċ Għawdxija Michael Grech esprima s-sodisfazzjon li ntlaħaq ftehim mas-Sindku u l-Kunsill Lokali tal-Mellieħa dwar kwistjoni fis-sistema tat-traffiku li nqalgħet f'dawn l-aħħar ġimgħat, fl-istess lokalita'.

Permezz ta' dan l-arranġament Triq George Borg Olivier ser terġa' tkun aċċessibbli għal vetturi ġejjin minn Għawdex u l-Għadira, filwaqt li vetturi kummerċjali ser jkomplu jgħaddu mit-triq ta' Popeye Village. Fi stqarrija Grech qal, li dan kien wieħed mis-suġġerimenti li l-Kamra tal-kummerċ Għawdxija kienet ipproponiet lis-Sindku tal-Mellieħa Robert Cutajar. Qalet ukoll li xtaqu li kienu nvoluti f'diskussjonijiet mal-istess Kunsill u ma' Transport Malta qabel ma ttieħdet id-deċiżjoni li tingħalaq it-triq ta' quddiem il-lukanda Seabank, kif ukoll mal-laqgħat li saru mal-GRTU u l-MHRA. Għal-Għawdxin din hija triq prinċipali u għalhekk huwa importanti li l-Għawdxin jiġu konsultati dwar deċiżjonijiet li jittieħdu, temm jgħid Michael Grech fl-istqarrija.