Sindku temporanju għall-Kunsill Lokali tal-Furjana

Fit-tliet xhur li ġejjin, il-kunsilliera Laburista Davina Sammut Hili se tkun is-Sindku tal-Kunsill Lokali tal-Furjana. Dan hekk kif fil-laqgħat kollha tal-Kunsill li saru fil-Furjana wara l-elezzjonijiet tal-10 ta' Marzu, ma ntlaħaqx qbil dwar min għandu jokkupa din il-kariga.

Il-Kunsill Lokali tal-Furjana bħalissa għandu żewġ kunsilliera tal-PN, Matthew Paris u Anthony Brincat u tnejn oħra tal-PL, Vince Borg u l-istess Hili. Hemm ukoll kandidat indipendenti, Nigel Holland.

Peress li ż-żewġ partiti għandhom l-istess numru ta' kunsilliera, fl-aħħar ġimgħat saru numru ta' votazzjonijiet bil-għan li jintlaħaq qbil, b'mod partikolari minħabba li l-kunsillier Nazzjonalista Anthony Brincat jinsab rikoverat l-isptar. Għalhekk mhux dejjem seta' jattendi l-laqgħat tal-Kunsill, inkluż il-laqgħa tal-lum.

Il-kunsillier tal-PN Matthew Paris innomina lil Nigel Holland bħala Sindku, filwaqt li Vince Borg, elett f'isem il-PL, innomina lil Sammut Hili. Fil-votazzjonijiet li saru Holland kiseb 2 voti favur u 2 kontra, l-istess bħal Sammut Hili.

Hekk kif wara 6 votazzjonijiet ma setax jintlaħaq qbil, daħlet fis-seħħ il-liġi tad-Dipartiment tal-Gvern Lokali, li tgħid li dik il-kunsilliera li tkun kisbet l-ikbar numru ta' voti fil-partit bl-iktar numru ta' voti, għandha tokkupa l-pożizzjoni ta' sindku għal 3 xhur. Dan sakemm terġa' tittieħed votazzjoni oħra mill-membri tal-Kunsill.

Intant, issa jmiss il-ħatra tal-Viċi-Sindku. F'din l-aħħar laqgħa, Holland innomina lil Matthew Paris għal din il-kariga filwaqt li Sammut Hili nnominat lil Vince Borg. Għal darb'oħra, wara sitt votazzjonijiet ma ntlaħaqx qbil, fatt li wassal biex din tiġi aġġornata għal-laqgħa li jmiss, fit-30 t'April.

Jekk jerġa' ma jintlaħaqx qbil għal din il-kariga, terġa' tidħol fis-seħħ id-direzzjoni tad-Dipartiment tal-Gvern Lokali u Vince Borg jinħatar Viċi-Sindku għat-tliet xhur li ġejjin.