Rebħa li biddlet pajjiż

Nhar id-9 ta' Mejju tal-1987 kienet saret l-elezzjoni li wasslet biex il-Partit Nazzjonalista ngħata l-mandat mill-poplu biex ikun jista' jiggverna. Dan wara li fl-1981, minkejja li ġab il-maġġoranza tal-voti, il-Partit Laburista, dak iż-żmien immexxi minn Duminku Mintoff, kien għażel li jibqa' jmexxi hu.

Kienet elezzjoni li saret fi żmien meta f'pajjiżna kien hawn tensjoni politika, kawża wkoll ta' vjolenza politika fil-konfront ta' partitarji Nazzjonalisti.

Kienet elezzjoni li segwiet xeni u avvenimenti li jibqgħu mniżżla bħala kapitlu iswed fl-istorja politika ta' pajjiżna, bħalma kienu l-vjolenza waqt il-mass meeting f'Tal-Barrani, li segwiet il-qtil politiku ta' Raymond Caruana, kif ukoll il-frame up fuq Pietru Pawl Busuttil.

Wara dik l-elezzjoni, fil-pajjiż bdiet bidla sħiħa. Bidla li kienet immexxija mill-Prim Ministru Eddie Fenech Adami, li ra kif pajjiżna seta' jaqbad rotta differenti minn dik li kienu daħħlu lil pajjiżna fiha gvernijiet Soċjalisti. Pajjiżna beda bl-espansjoni f'diversi setturi u llum qed ingawdu wkoll deċiżjonijiet li kienu ttieħdu minn dak il-gvern li biddel pajjiż.

Rajna l-liberalizzazzjoni tax-xandir, li wasslet għall-pluraliżmu, rajna riformi sħaħ u setturi li kienu kkontrollati mill-gvern li bdew jiġu liberalizzati.

 

 

 

Kien Gvern Nazzjonalista li wassal biex illum pajjiżna jinsab membru sħiħ fl-Unjoni Ewropea, li llum qed tfakkar it-twaqqif tagħha. Minn hemm pajjiżna baqa'  jaħdem biex issieħeb ukoll fiż-żona ewro.

Illum, grazzi għar-riformi li wettqu gvernijiet Nazzjonalisti, pajjiżna jinsab iħares 'il quddiem biex ikun ċentru ta' eċċellenza f'diversi oqsma. Ċirkustanzi li wasslu biex qed nispikkaw f'setturi bħalma huma s-servizzi finanzjarji, l-ICT, is-settur tal-farmaċewtika, u oħrajn.

Dan kollu seħħ grazzi għall-fatt li l-poplu kien wera, u baqa' juri fiduċja fil-Partit Nazzjonalista.