Reġistrat titjib għall-banek Maltin minkejja l-maltemp ekonomiku

Minkejja l-kriżi finanzjarja dinija u l-maltemp ekonomiku ta' madwarna, il-grupp Bank of Valletta rraporta profitt qabel it-taxxa ta' €49.1 miljun għall-ewwel sitt xhur tas-sena finanzjarja 2012. Dan ifisser żieda ta' kważi €4 miljun fuq il-profitt li għamel il-BOV fl-istess perjodu s-sena l-oħra.

Meta kien qed jippreżenta r-riżultati ta' nofs is-sena, iċ-Chairman tal-BOV Roderick Chalmers fakkar li fl-ewwel 3 xhur tas-sena finanzjarja kurrenti kien hemm kriżi aktar profonda fiż-Żona Ewro li kienet mtaffija bil-miżuri li ħa l-Bank Ċentrali Ewropew.

Chalmers qal li l-BOV sar l-ewwel bank f'Malta li wiegeb ghall-preferenzi dejjem jinbidlu tal-klijent u ricentement anke nieda s-servizz tal-mobile banking. S'issa 6,600 klijent applikaw ghal dan is-servizz.

Iċ-Chairman qal li l-Bank kompla bl-inzjattiva tal-JEREMIE li tgħin lill-intrapriżi żgħar u medji b'self, u spjega li minn din l-inzjattiva konġunta mal-Kummissjoni Ewropea u l-Fond Ewropew għall-Investiment, s'issa n-negozji ż-żgħar gawdew minn total ta' €23 miljun.  Iċ-Chairman ta ħarsa lejn l-ekonomija Maltija u qal li hu essenzjali għal Malta li tkompli tiżviluppa f'setturi ġodda ta' attivita' bħala mezz kif tiġġieled kull tnaqqis potenzjali f'setturi li qabel kienu suċċess. Hu faħħar il-wasliet stabbli tat-turisti, il-livelli kostanti ta' impjieg u s-settur tas-servizzi b'saħħtu. 

Anke' l-APS Bank żied il-profitti minkejja il-kriżi finanzjarja. Fil-fatt, fl-2011 l-APS Bank irreġistra kważi €8.5 miljun fi profitt qabel it-taxxa. Dan fisser sena rekord oħra għall-Bank fid-dħul tiegħu.

Meta indirizza l-laqgħa ġenerali annwali tal-bank, iċ-Chairman tal-APS Emanuel Delia innota li r-riżultati miksuba juru li l-kunċetti ta' impenn soċjali u profittabilta m'humiex inkonsistenti.

Ir-riżultati miksuba matul l-2011 juru li l-assi totali tal-Bank kibru għal €814 miljun minn €787 miljun, waqt li s-self żdied b'€51 miljun. Min-naħa l-oħra, id-depożiti naqsu bi ftit, nuqqas ta' €12-il miljun.