Prestazzjoni ekonomika impressjonanti - l-IMF

Skont il-Fond Monetarju Internazzjonali (IMF), il-qagħda finanzjarja ta' Malta miexja 'l quddiem b'mod impressjonanti, il-konsum pubbliku qed jiżdied, it-turiżmu qed jiżdied, l-esportazzjoni ukoll qed tiżdied, filwaqt li l-pajjiż qed isir aktar kompetittiv u l-ekonomija qed tirkupra tajjeb mill-effett tal-kriżi ekonomika dinjija.

Ir-rapport ġie ppreżentat mill-Ministru tal-Finanzi Tonio Fenech f'konferenza tal-aħbarijiet li matulha spjega kif l-IMF reġgħet tat ċertifikat mill-aqwa lil pajjiżna.

Il-Ministru Fenech qal li dan hu rapport ieħor pożittiv li jfaħħar il-prestazzjoni fil-qasam ekonomiku u l-qasam tax-xogħol.

Ir-rapport tal-IMF jikkonferma d-decizjonijiet għaqlin li ħa l-Gvern fl-eqqel tar-riċessjoni internazzjonali – meta pajjiżi kbar irreġistraw tnaqqis ekonomiku ta' 2%, Malta kellha tkabbir ta' 1.5%.

L-IMF terga' tikkonferma s-saħħa tas-settur finanzjarju tal-pajjiż, l-inflazzjoni hija anqas mill-medja Ewropea, filwaqt illi ixxejjen għal kollox l-akkuzi tal-Oppozizzjoni laburista illi qed tgħid li Malta mhux veru qed tilħaq il-miri finanzjarji tagħha. Issa, anke istituzzjoni ewlenija bħal mhi l-IMF qed tgiddeb dawn l-għajdut.

Il-Ministru Tonio Fenech spjega li l-Gvern għandu programm ċar biex inaqqas l-iżbilanċ, u se jkompli jaħdem biex jintlaħqu dawn il-miri. Il-Ministru fakkar kif tul l-aħħar snin il-Gvern introduċa diversi inċentivi għan-negozjant iż-żgħir, kien hemm tnaqqis fl-income tax fi tliet Budgets konsekuttivi, filwaqt li l-pajjiż ibbenifika minn miljuni ta' fondi Ewropej.

F'dan ir-rapport l-IMF ifaħħar il-politika tal-Gvern, li jirreferi għaliha bħala 'prudenti' f'ċirkustanzi globali diffiċli.

Fuq kollox, L-IMF jiddeskrivi l-performance ekonomika ta' pajjiżna bħala impressjonanti u jgħid li Malta hija wieħed mil-aktar pajjiżi fost dawk avvanzati li wettaq progress f'dan is-sens.