Numru ta' Libjani li jgħixu Malta jipprotestaw kontra min qed imexxi l-ambaxxata Libjana

Numru ta' Libjani li jgħixu f'Malta qed jipprotestaw kontra min qed imexxi l-Ambaxxata Libjana f'pajjiżna, għax skont huma dawn m'humiex maħtura bħala uffiċjali Libjani għal Malta. Dan is-sit tkellem ma' wħud minn dawk li t-Tnejn filgħodu nġabru jipprotestaw quddiem l-ambaxxata Libjana f'Ħ' Attard, li qalu li n-nies tal-ambaxxata m'huma qed jagħmlu xejn sabiex itejbu l-għajxien tal-Libjani f'Malta. 

Huma qed jgħidu li dawk li qed imexxu l-ambaxxata Libjana f'pajjiżna qed japprofittaw mill-pożizzjoni tagħhom billi jieħdu donazzjonijiet li jaslu Malta mil-Libja għall-ħtiġijiet personali tagħhom. Il-Libjani sostnew li issa li pajjiżhom sar pajjiż demokratiku jixtiequ li l-persuni li jirrappreżentawhom f'Malta jkunu dawk li verament jirrispettaw id-drittijiet tal-komunita' Libjana f'Malta.

Bħala Libjani li jgħixu f'Malta huma jixtiequ li jivvutaw għall-mexxej il-ġdid tal-Libja hekk kif ix-xahar id-dieħel se ssir l-ewwel elezzjoni wara 42 sena ta' dittatorjat taħt it-tmexxija ta' Ghaddafi. Izda l-Libjani li jgħixu f'Malta qed isostnu li l-ambaxxata s'issa ma għamlet xejn sabiex huma jingħatalhom id-dritt li jivvutaw.

Aktar tard matul il-jum tat-Tnejn il-Libjani li kienu qed jipprotestaw kellhom laqgħa ma' uffiċċjal Libjan għall-Affarijiet Barranin fejn ġie konkluz li se jsir minn kollox sabiex il-persuni fl-ambaxxata jitneħħew mill-pożizzjoni tagħhom u li bħala Libjani li jgħixu Malta jingħatalhom id-dritt li jivvutaw fl-elezzjoni li se ssir fil-Libja f'Ġunju.

Matul din il-laqgħa, bħala komunita' Libjana f'Malta huma esprimew ukoll ix-xewqa li jkun hemm aktar tisħiħ tal-investiment bejn iż-żewġ pajjiżi fejn għandu x'jaqsam mal-edukazzjoni bi proġetti li jgawdu minnhom kemm il-poplu Malti kif ukoll dak Libjan