Nirien fil-kampanja ta' Sqallija

Fi Sqallija l-protezzjoni ċivili lokali qed iħabbtu wiċċhom ma' għadd ta' nirien fil-kampanja filwaqt li f'Palermo, l-awtoritajiet jinsabu qrib li jikkontrollaw nar li ilu jaqbad fil-miżbla ta' Bellolampo għal ġimgħa.

Fi tmiem il-ġimgħa li għaddiet diversi nirien feġġew fil-provinċja ta' Trapani partikolarment fiz-zona turistika ta' San Vito Lo Capo, Castelluzzo kif ukoll r-riserva naturali ta' Zingaro fejn kien hemm bżonn li jiġi evakwat residenza turistika fejn kien hemm 900 persuna.

Iżda l-agħar sitwazzjoni qed tiġi rapportata fiz-zona ta' Palermo fejn hemm jaqbdu tal-anqas ħames nirien kbar. Nhar is-Sibt kien hemm persuna li mietet waqt li kienet qed taħdem biex jiġi kontrollat nar f'Castronovo di Sicilia f'Palermo. Hawn l-agħar nirien jinsabu fil-foresta tal-Madonie fejn issa anki d-djar jinsabu mhedda.

Mas-sebħ tal-lum kien hemm tal-anqas 15-il nar kbir madwar Sqallija u li kontrihom kienu qed jintużaw l-ajruplani speċjalizzati għal kontra n-nirien. Anki f'Messina hemm nar kbir jaqbad fl-inħawi ta' Santa Lucia del Mela filwaqt li f'Katanja l-agħar nar hu dak f'Linguaglossa taħt l-Etna.