Neil CAMILLERI
5 t' Awwissu, 2012
18:13 CET |
L-iskema tal-Micro Guarantee li ftit jiem ilu tnidiet uffiċċjalment mill-Gvern hija skema li tgħin lin-negozji sabiex ikomplu jinvestu, jkabbru l-operat tagħhom u jsaħħu l-ekonomija Maltija. In-negozji ż-żgħar huma s-sinsla tal-ekonomija Maltija u l-Gvern qiegħed kontinwament joħloq skemi u inċentivi sabiex jgħin lin-negozji jkomplu jirnexxu.
L-iskema, li tħabbret fl-aħħar Bagit, u li daħlet fis-seħħ fl-1 ta' Awwissu, toffri l-opportunita' lis-self-employed u sidien ta' negozji li jħaddmu sa 20 ruħ, li jgawdu minn garanziji biex jieħdu self minn banek biex ikunu jistgħu jew jibdew negozju jew anki jkabbru n-negozju tagħhom. Il-Gvern se jkun qed jiggarantixxi sa 90% tas-self.
Il-kap tal-Oppożizzjoni Joseph Muscat mill-ewwel kien xettiku dwar din l-iskema - sa minn meta tħabbret fil-bagit. Fir-risposta tiegħu għad-diskors tal-bagit f'Novembru li għadda, Muscat kien qal li dawn it-tip ta' skemi humiex permissibbli taħt ir-regoli tal-Unjoni Ewropea.
Iżda Muscat kien żbaljat. Din l-iskema hi permissibbli u l-Gvern għamel użu minnha biex ikompli jgħin lin-negozji żgħar u medji. Muscat kontinwament jipprova jaqta' qalb in-negozjanti, u filwaqt li jagħmel ħafna wegħdi, għadu sal-lum ma ppreżenta l-ebda proposta konkreta dwar dan is-settur.
B'kuntrast man-nuqqas ta' proposti mill-Oppożizzjoni, tul din il-leġiżlatura l-Gvern ħoloq skemi u inċentivi biex isaħħaħ in-negozji u jinħolqu l-impjiegi. Fosthom l-iskema MicroCredit, li minnha gawdew iktar minn 300 negozju - li bejniethom ħadu €30 miljun u investew €50 miljun lura fl-ekonomija. L-iskema MicroInvest applikaw għaliha iktar minn 1,700 negozju, b'400 minnhom huma negozji Għawdxin u bejniethom impjegaw 360 persuna.
|
sezzjoni: aħbarijiet lokali
Ċentri tas-saħħa
