Mixli b’attentat ta’ ferita gravi

John Azzopardi ta’ 52 sena minn Ħal-Qormi u residenti l-Imsida kien mixli quddiem il-Maġistrat Antonio Mizzi li fit-23 ta’ Mejju li għadda fl-Imsida u nħawi oħra tal-Gżejjer Maltin kkommetta attentat ta’ ferita gravi fuq Mario Farrugia meta tah daqqa ta’ sikkina.

Azzopardi li wieġeb mhux ħati kien mixli li daqqa ta ‘żbrixx fuq Farrugia, bid-delitt tal-ferita’ gravi ma jiġix segwit minħabba xi ħaġa aċċidentali u ndipndenti mill-volonta’ tiegħu.

L-akkużat li qal li huwa negozjant kien mixli wkoll li kkaġuna ferita ħafifa fuq l-istess persuna u li ġarr strument li jaqta’ u bil-ponta mingħajr liċenzja tal-Kummissarju tal-Pulizija. 

Huwa ngħata l-liberta’ prviżorja fuq garanzija personali ta’ €15,000. Għalih deher l-Avukat Stephen Tonna Lowell filwaqt li l-Prosekuzzjoni tmexxiet mill-Ispettur Kevin Farrugia.