Minflokk wieġbet għażlet li 'tidħak'

Wara d-diskors tal-mexxej Laburista Joseph Muscat, f'attivita politika li saret il-Ħadd f'Ħal Għaxaq, dan l-istazzjon tkellem mal-kandidata tal-PL Deborah Schembri dwar jekk taqbilx mal-politika li kien addotta Gvern laburista 30 sena ilu, meta numru kbir ta' ħaddiema tkeċċew mix-xogħol għax ma daħlux jaħdmu f'jum ta' festa – fl-Imnarja.

Għal din il-mistoqsija il-kandidata Laburista spiċċat tidħak minflok tat it-tweġiba tagħha.

Dan l-istazzjon tkellem mal-opinjonista Gejtu Vella, dwar jekk ir-reazzjoni ta' Deborah Schembri kinietx waħda korretta bħala persuna li illum hi kandidata tal-Partit Laburista.

Fid-29 ta' Ġunju 1982, f'jum l-Imnarja ta' tletin sena ilu, eluf ta’ ħaddiema kienu sfidaw il-Gvern Laburista u mmexxijin mill-Partit Nazzjonalista kienu bdew kampanja kontra l-Gvern Laburista li kien baqa' jmexxi wara elezzjoni li fiha l-maġġoranza assoluta tal-elettorat kien warrbu.

Kien propju fl-Imnarja - il-ġurnata li l-Labour kien neħħieha minn festa – meta ħaddiema Maltin iddeċidew li jieħdu vaganza skont il-vot tal-poplu fl-elezzjoni ġenerali ta' qabel, u ngħaqdu mal-Partit Nazzjonalista f’attivita’ fil-Mellieħa. U għal dan, il-Gvern Laburista kien rreaġixxa b’sensji, tkeċċijiet mix-xogħol, arresti u swat fil-kwartieri ġenerali tal-pulizija

Gejtu Vella għamel enfasi fuq il-fatt li dak li ġara 30 sena ilu kien parti negattiva mill-istorja politika ta' pajjiżna.