Ma teskludix li tuża l-armi kimiċi

Kelliem għall-Ministeru tal-Affarijiet Barranin Sirjan ilbieraħ qal li s-Sirja kienet se tuża l-armi kimiċi li għandha jekk ikun hemm attakk barrani kontriha iżda ma kellhiex l-intenzjoni li tużahom kontra l-popolazzjoni ċivili.

Jihad Makdissi insista li r-reġim Sirjan qatt ma kien se juża dawn l-armi kontra l-poplu tiegħu stess u li dawn l-armi, aktarx l-akbar ħażna tagħhom fid-dinja, kienu mgħassa mill-Armata Sirjana.

Il-{add, il-Prim Ministru Iżraeljan Benjamin Netanyahu qal li l-akbar theddida għall-Iżrael hu li r-reġim Sirjan jikkrolla u l-ħażna ta' armi kimiċi u missili jispiċċaw f'idejn il-grupp militanti Libaniż, il-Hezbollah.

Fi tmiem il-ġimgħa, Ehud Barak, il-Ministru tad-Difiża Iżraeljan, qal li l-Iżrael kien se jikkunsidra azzjoni militari biex ikun assigurat li l-armi kimiċi u l-missili Sirjani ma jispiċċawx f'idejn il-Hezbollah.

Hawn Netanyahu tenna wkoll li l-Hezbollah u l-Iran kienu wara l-attakk terroristiku tal-ġimgħa li għaddiet  fil-Bulgarija.

Waqt intervista mal-istazzjon televiżiv Amerikan “Fox News”, Netanyahu qal li r-reġim tal-President Bashar al-Assad kien se jikkrolla.

Hu qal li l-Iżrael kien qed jikkunsidra x'azzjoni jieħu jekk jikkrolla r-reġim u jintmissu l-armi kimiċi.

Apparti t-tħassib tal-Iżrael, is-Senatur Amerikan John McCain qal li hemm periklu li r-reġim Sirjan juża l-armi kimiċi kontra r-ribelli.

Jay Carney, kelliem għall-President Amerikan, qal li s'issa jidher li l-armi kimiċi kienu għadhom il-kontroll tar-reġim Sirjan iżda kien hemm għassa fuqhom u l-Istati Uniti kienet qed tikkonsulta mal-pajjiżi ġirien tas-Srija dwar is-sitwazzjoni.