L-Arriva solviet il-maġġoranza tal-ilmenti tal-passiġġieri

Sena mir-riforma fis-servizz tat-trasport pubbliku, l-Arriva ddikjarat li wara l-bidliet tas-27 ta' Mejju ta’ din is-sena, żdiedu 19-il rotta u ġew riveduti 42 u b'hekk ġew solvuti l-maġġoranza tal-ilmenti tal-passiġġieri. 

Dan sar wara konsultazzjonijiet mal-awtoritajiet lokali, ma’ Transport Malta kif ukoll ġew ikkunsidrati lmenti li daħħlu għand is-servizz tal-konsumatur tal-Arriva.

F'għeluq l-ewwel sena mill-operat tagħha, l-Arriva ssostniet li 99% tal-karozzi li tuża  huma mgħammra b'arja kkundizzjonata u minn flotta ta' 285 xarabank li jaqdu r-rotot ta' kuljum, 187  minnhom għandhom medja ta’ sena. 

Is-servizz ta’rasport pubbliku mħaddem mill-Arriva jkopri 74,000 kilometru kuljum f'Malta u f'Ghawdex, ekwivalenti għal 26 miljun fis-sena. Dan joffri netwerk estensiv ta' ivvjaġġar.

Arriva tirribatti l-allegazzjoni li l-karozzi jiġu tard jew idumu ħafna ma jaslu fid-destinazzjoni, u qalet li għalkemm tiltaqa' ma' xogħol fit-toroq, traffiku u  karozzi ipparkjati ħażin li jibblukkaw it-toroq, tasal fil-ħin stipulat għal 92% tal-vjaġġi. Il-kumpanija u l-1,100 ħaddiem tagħha jassiguraw li jaħdmu bis-sħiħ sabiex javvanzaw l-operat.

Arriva tiġġustifika l-fatt li sabiex takkomoda l-passiġġieri, hi topera 26 rotta għal Mater Dei u 48 rotta mill-ibliet u l-irħula għall-Belt.  Servizzi oħra jinkludu n-netwerk f'Għawdex, is-servizz frekwenti għall-ajruport, għaċ-Cirkewwa, is-servizz ta' bil-lejl u s-servizz għal bajjiet popolari.

L-Arriva appellat lill-pubbliku li f'kaz ta' ilmenti jew informazzjoni dwar l-operat tal-Arriva, juża s-servizz tal-konsumatur tagħha u jċempel fuq 21222000 jew jidħol fuq is-sit elettroniku enquiries.com.mt.