24 ta' Mejju, 2012
16:05 CET |
Il-Ħamis fil-għaxija l-kantant Malti Kurt Calleja flimkien mal-band tiegħu se jkun qed ikanta l-kanzunetta This is the Night fis-57 edizzjoni tal-Eurovision Song Contest li qed isir f'Baku l-Azerbaijan.
Kurt Calleja se jkun qed jikkompeti ma' 17-il kanzunetta oħra li minnhom iridu jintgħażlu għaxra sabiex jingħaqdu mal-kumplament tal-kanzunetti l-oħra li diġa' għaddew għall-finali. Dawn huma siltiet mir-rehearsal li kellu Kurt Calleja fuq il-palk tal-Eurovision f'Baku l-Azerbaijan fl-aħħar sigħat bi thejjija għas-semi-finali tal-Ħamis filgħaxija meta għajnejn il-Maltin u l-Għawdxin se jkunu fuqu, bit-tama li jdaħħal lil Malta fil-finali ta' dan il-festival.
Wara li nhar it-Tlieta fil-Baku Cyrstal Hall saret l-ewwel semifinali tas-57 edizzjoni tal-Eurovision Song Contest, Malta se tieħu sehem fit-tieni semifinali, bis-silta This is the Night interpretata mill-Ambaxxatur tal-kanzunetta Maltija għal din is-sena Kurt Calleja flimkien mal-band tiegħu.
F'din it-tieni semi finali Kurt Calleja kellu jkanta fir-raba' post minn fost it-18-il kanzunetta fil-kompetizzjoni.
Għaxra minn dawn it-18-il kanzunetta jridu jgħaddu għall-finali tas-Sibt li ġej 26 ta' Mejju meta jingħaqdu mal-għaxar kanzunetti li diġa' għaddew mill-ewwel semifinali ta' jumejn ilu.
Dawk li għaddew s'issa huma l-Greċja, Ċipru, ir-Rumanija, il-Moldova, l-Iżlanda, l-Ungerija, id-Danimarka, l-Albanija, l-Irlanda u r-Russja, li bil-babushki, jew nanniet, kellha waħda mill-iktar kanzunetti li spikkaw.
B'kollox din is-sena pparteċipaw 36 pajjiż, bl-Azerbaijan bħala l-pajjiż organizzatur, flimkien mal-ħames pajjiżi l-kbar - Franza, il-Ġermanja, l-Italja, Spanja u r-Renju Unit ikollhom post garantit fil-finali.
L-għażla finali tkun maqsuma – 50% bil-voti tal-ġurija esperta, u l-50% l-oħra mit-televoting.
|
sezzjoni: Divertiment
Ċentri tas-saħħa
