25 t' April, 2012
16:27 CET |
Il-ħidma ta' Simon Busuttil, bi tfassil ta' rapport dwar id-diffikultajiet tal-klijenti u l-intrapriżi Ewropej, sabet l-appoġġ unanimu tal-membri kollha tal-Kumitat tal-Petizzjonijiet fi ħdan il-Parlament Ewropew. Dan hekk kif l-ewroparlamentari Malti nħatar bħala r-rapporteur uffiċjali ta' dan il-kumitat, kariga li ġabet magħha r-responsabbilta' li jfassal dan l-istess rapport.
Fir-rapport tiegħu, Busuttil isemmi għoxrin diffikulta', fosthom problemi fil-proċeduri tas-sigurta' soċjali, fis-servizzi tas-saħħa meta wieħed ikun barra minn pajjiżu u fil-proċess biex il-kwalifikazzjonijiet ta' ċittadin Ewropew jiġu aċċettati f'pajjiż ieħor fl-Unjoni Ewropea. Fi stqarrija, Busuttil qal li bosta drabi l-Parlament Ewropew jenfasizza l-bżonn li jisma' l-ilmenti tal-klijenti, xi ħaġa li minħabba l-burokrazija, mhux dejjem isseħħ. L-irwol tal-ewroparlamentari huwa li jisimgħu lil dawn il-persuni iżda waħedhom mhux dejjem jirnexxilhom isibu s-soluzzjoni meħtieġa. Huwa għalhekk, kompla Busuttil, li dan ir-rapport għandu rwol importanti.
Fir-rapport tiegħu, Simon Busuttil laqa' b'sodisfazzjon il-ħidma li qed issir minn netwerks Ewropej bħal SOLVIT, is-servizz EuropeDirect u s-sit informattiv YourEurope, li qed ikollhom rwol importanti fil-ħidma biex jissolvew il-problemi tal-Ewropej. Biss, Busuttil saħaq ukoll fuq l-importanza li l-Parlament Ewropew jibqa' jaħdem biex itejjeb il-qagħda preżenti. Hu qal li, meta qed ifittxu servizz mill-Unjoni Ewropea, bosta ċittadini jitħawwdu jew jafu saħansitra jaqtgħu qalbhom għal kollox. Dan iwassal biex jitilfu l-fiduċja tagħhom fix-xogħol tal-Unjoni Ewropea, kompla Simon Busuttil.
Huwa għalhekk li qed jisħaq fuq il-bżonn li jkun hemm kuntatt personali ma' dawn il-persuni fil-pajjiżi rispettivi tagħhom, possibilment b'rappreżentanti apposta fl-Uffiċji tal-Kummissjoni Ewropea fil-pajjiżi membri.
|
sezzjoni: Ewropa
Ċentri tas-saħħa
