3 ta' Lulju, 2012
20:16 CET |
L-Ispettur Chris Pullicino xehed ilbieraħ fil-Qorti li l-akkużat Silvio Mangion kien jaf x'kien qed jagħmel meta mar biex jisraq lill-anzjana Maria Stella Magrin tant li kellu sikkna biex joqtolha biex b'hekk hi ma tkunx f'pożizzjoni li tagħrfu.
Din ix-xhieda ngħatat waqt ġuri li beda fil-Qorti presdeut mill-Imħallef Lawrence Quintano li jrid jiddeċiedi jekk Silvio Mangion kienx f'sensih meta qatel lil Maria Stella Magrin.
Il-każ imur lura għall-1986 meta kien allegat li Mangion daħal fir-residenza ta' Magrin, serqilha flus u qatilha. Magrin kellha 68 sena u nqatlet bi 13-il daqqa ta' sikkina.
L-Avukat Prosekutur Nadine Sant qalet li kien fl-2005 li l-akkużat tkellem dwar dan il-każ ma' Steven Spiteri u l-każ kien rappurtat lill-pulizija. Tliet esperti psikjatriċi kkonkludew li Mangion kien f'kundizzjoni medika li jgħaddi ġuri.
Fl-2010, Mangion ingħata sentenza ta' għomru l-ħabs wara li nstab ħatti li qatel lil Rosina Zammit ta' 54 sena f'Ħal Safi fl-1984. Hi nqatlet b'37 daqqa ta' sikkina. Mangion kien instab ħati wkoll li fl-2002 qatel lil Francis Caruana u wettaq attentat ta' qtil fuq oħtu Ġużeppa f'serqa oħra fl-1998. L-Imħallef Galea Debono kien iddeskriva lil Mangion bħala serial killer.
L-Ispettur Pullicino qal li l-akkużat kien ammetta mal-pulizija l-involviment fil-qtil ta' Magrin u ta dettalji dwar kif dan seħħ waqt li anki semma lil Oswald Spiteri bħala kompliċi. Persuna oħra involuta fil-qtil kien Leli Spiteri li miet fl-2000. L-Ispettur Pullicino qara mill-istqarrija li għamel Mangion li fiha ammetta li huma riedu joqtlu lill-anzjana biex ma tagħrafhomx.
Il-psikjatri Ethel Felice, George Debono u Peter Muscat xehdu li huma eżaminaw lil Mangion fis-7 ta' Ġunju u kkonkludew li hu jista' jitressaq ġuri għax jista' jsegwi l-proċeduri kontrih.
L-Avukat Simon Micallef Stafrace qed jiddefendi lill-akkużat.
|
sezzjoni: Mill-Qorti
Ċentri tas-saħħa
