Jiżdiedu n-numru ta' azzjonijiet industrijali

Wara li ma kien hemm l-ebda żblokk fil-kwistjoni tar-reviżjoni tal-Ftehim Settorali tal-Paramediċi, it-Taqsima Servizzi tas-Saħħa tal-UHM iddeċidiet li għandhom jiżdiedu n-numru ta' azzjonijiet industrijali. Dawn l-azzjonijiet se jidħlu fis-seħħ nhar l-Erbgħa.

Fi stqarrija l-Union Ħaddiema Magħqudin, qalet li t-Taqsima Servizzi tas-Saħħa tal-UHM tikundanna l-aġir ta' numru żgħir ta' membri tal-amministrazzjoni fejn b'mod mill-aktar abbużiv intimidaw ħaddiema sabiex ma jkomplux isegwu l-azzjonijiet industrijali.

It-Taqsima Servizzi tas-Saħħa tisħaq li kull ħaddiem għandu dritt fundamentali li jsegwi azzjonijiet industrijali li huma skont il-parametri tal-liġi u l-ebda persuna m'għanda d-dritt li ċċaħħad dan.

Fost id-direttivi se jkun hemm stennija ta’ mill-inqas nofs siegħa għall-outpatients minn meta l-pazjenti jaslu għall-appuntament, u mhux se jiġu invistati każijiet ġodda fl-isptarijiet tal-anzjani sakemm mhux ta’ periklu għal ħajjithom.