Jiċħad għal bailout 'totali'

Il-Ministru Spanjol għall-Ekonomija Luis de Guindos qal li Spanja m'għandhiex bżonn pakkett ta' għajnuna (fiskali) totali u simili għal li kellhom jaċċettaw il-Greċja, l-Irlanda u l-Portugall.

Intant, Spanja diġà innegozjat pakkett ekwivalenti għal mitt biljun ewro flimkien mas-sieħba taz-Zona Ewro u l-Fond Monetarju Internazzjonali (IMF) u bl-iskop li ssostni l-banek tagħha li ffaċċjaw il-problemi sostanzjali.

Iżda waqt li l-Gvern ta' Madrid jinsisti li qed jindirizza l-impenji kruċjali, il-problemi għall-finanzjament tar-reġjuni Spanjoli jagħtu lok għal tħassib u bl-analisti jwissu li l-pajjiż se jeħtieġ bailout sovran 'fit-totalità tiegħu'. Madankollu, De Guindos qal li r-reazzjoni tas-swieq hi waħda 'irrazzjonali' u li l-inċertezzi ma jaffettwawx biss lil Spanja – 'b'din is-sitwazzjoni  qed tinvolvi l-futur taz-zona ewro.'L-istess Ministru deher quddiem il-Parlament biex jispjega d-dettalji tal-Ftehim tal-Eurogroup għall-programm tar-rikapitalizzazzjoni tal-banek Spanjoli u fejn tenna li l-Gvern tal-Prim Ministru Mariano Rajoy għamel minn kollox biex jaċċerta li Spanja terġa' taqbad it-triq għall-iżvilupp.

Filwaqt li De Guindos insista li Spanja m'għandhiex tidħol għal bailout sħiħ, żewġ reġjuni Spanjoli – Valencia u Murcia –  diġà talbu l-għajnuna finanzjarja mingħand il-Gvern ċentrali u wara li s-sbatax-il reġjuni awtonomi tal-pajjiż (mifnija kif inhuma bid-dejn) ma jistgħux jirrikorru għas-self mingħand is-swieq internazzjonali.

Ir-reġjuni Spanjoli din is-sena jeħtieġu jerġgħu jiffinanzjaw mas-36 biljun ewro ta' dejn u t-tragward ilu jqajjem tħassib partikulari għall-investituri mindu r-reġjuni, fl-2011, ma laħqux il-miri tal-iżbilanċ.

L-istampa Spanjola temmen li tal-anqas sitt reġjuni għandhom jitolbu l-għajnuna u jikkumplikaw l-isforzi ta' Madrid biex jevitaw bailout sħiħ u fost effetti negattivi għas-swieq fejn qed jinkwetaw dwar 'l-eventwalità’. Dan meta l-imgħaxijiet fuq l-investimenti fil-bonds (validi għal għaxar snin) fuq is-self ta' Spanja issa laħqu għoli ta' 7.59 fil-mija u li hu l-ogħla livell fiż-żmien kollu li ilha teżisti z-Zona Ewro.