Iridu lil Boris bħala Prim Ministru

Impressjonati mis-suċċess tal-organizzazzjoni tal-Logħob Olimpiku, kważi tliet kwarti tal-Ingliżi issa jridu lis-Sindku ta’ Londra, Boris Johnson, biex ikun il-Prim Ministru.

Johnson, li għandu 48 sena u hu membru tal-Partit Konservattiv u eks Membru tal-Parlament, darba qal li kellu l-istess ċans li jsir Prim Ministru daqs kemm kellu ċ-ċans isib lil Elvis ħaj. Imma hu kien imfaħħar ħafna għall-mod kif mexa rigward il-Logħob Olimpiku.

Fi stħarriġ li sar ilbieraħ għal-Ladbrokes, il-kumpanija tal-imħatri, 71 fil-mija qalu li xtaqu jarawh isir Prim Ministru.

Issa, il-Ladbrokes qed toffri mħatri ta’ 2 kontra wieħed li Johnson jerġa’ jkun elett Sindku fi żmien erba’ snin oħra, u tlieta kontra wieħed li jsir Prim Minsitru qabel l-2030.

Johnson jiċħad bil-qawwa li għandu xi interess li jsir Prim Ministru, u kull darba li jitqanqal dan is-suġġett jagħmel ħiltu biex iwarrab is-suġġett, spiss b’xi ċajta.

Iżda diversi osservaturi politiċi, kemm fir-Renju Unit kif ukoll barra, irrimarkaw li Johnson hu forsi l-uniku politiku fir-Renju Unit li jista’ jispiċċa f’sitwazzjoni imbarazzanti u minflok in-nies iwarrbuh iżjed jarawh simpatiku.

Il-ġimgħa li għaddiet, waqt avveniment pubbliċitarju, hu tħalla diversi minuti mwaħħal f’għoli ta’ 46 metru quddiem folla nies. Johnson hu persunaġġ goff, li jħobb jiċċajta u jagħti l-impressjoni li ma jiħux l-affarijiet bis-serjetà.

Biex Johnson isir Prim Ministru, hu l-ewwel irid jerġa’ jiġi elett fil-Parlament, wara li kien telaq fl-2008 biex isir Sindku. Iżda filwaqt li għandu l-kariżma, l-osservaturi jfakkru li l-ħajja privata tiegħu hi ostaklu kbir fit-triq biex isir Prim Ministru.