Ippreżentata f'Malta l-karozza elettrika l-ġdida tal-Mitsubishi

Il-Kumpanija Mizzi Organisation illum ippreżentat il-karozza l-ġdida elettrika tal-Mitsubishi. Din il-karozza se tkun qed tħalli impatt pożittiv fuq it-trasport f'pajjiżna, għaliex il-karozzi fully-electric jgħinu għall-ħarsien tal-ambjent.

Preżenti għat-tnedija ta' din il-karozza kien hemm il-Ministru għar-Riżorsi u l-Affarijiet Rurali George Pullicino kif ukoll il-Ministru tal-Infrastruttura, it-Trasport u l-Komunikazzjoni, Austin Gatt. Il-Ministru Pullicino sostna li sal-2020 f'pajjiżna jrid ikun hawn mal-5,000 karozza elettrika biex jgħinu lill-Gvern jilħaq l-mira li jnaqqas dak li jissejjaħ il-carbon foot print bi 8,000 tunnellata ta' CO2.

Huwa semma wkoll kif fl-aħħar Baġit il-Gvern ħġabbar skema li permezz tagħha dawk kollha li jixtru karozza elettrika jingħataw €5,500 li €3,000 minnhom jmorru għax-xiri ta' sistema fotovoltajka sabiex tiġġenera l-elettriku għal dawn il-vetturi, permezz ta' pannelli solari, u €2,500 ewro bħala cash grant.

Fil-futur qrib il-Gvern se jkun qiegħed ukoll joħroġ fis-suq 24 karozza elettrika sabiex jippruvawha kemm il-kumpaniji u organizzazzjonijiet u anke l-pubbliku u se jkun hemm ukoll mal-100 charging station mifruxin ma' Malta u Għawdex li se jkunu parti minn sistema waħda.