Inawgurat il-pont il-gdid fil-Port il-Kbir

'Dan il-proġett inqisu simbolu ta' l-isforz kontinwu li jagħmlu l-ħaddiema Maltin u Għawdxin biex dan il-pajjiż immexxuh 'il quddiem, b'viżjoni ċara ta' fejn irridu ntejjbu u ta' fejn irridu nwassluh.' Parti mid-diskors tal-Ministru ghall-Infrastruttura, Trasport u Komunikazzjoni, Austin Gatt, waqt l-inawgurazzjoni tal-pont ta' Sant'Iermu, fil-Belt Valletta.

Il-Ministru Gatt qal li minn wara l-kisba tal-Indipendenza, kull Gvern wara l-ieħor, dejjem ikkunsidra li dan il-pont jerġa jinbena. Wara aktar minn 65 sena, dan il-Gvern irnexxielu! L-istess kif qed jirnexxielu jiġġenera u jagħti d-dinjita' mistħoqqa lill-Belt Valletta. Fil-fatt dan huwa simbolu tal-bidliet u l-proġetti kollha li bdew iseħħu fl-aħħar erba' snin kemm fil-Belt, il-Port il-Kbir u fil-Port ta' Marsamxett.

Dan il-Gvern sostna l-Ministru Gatt, qed jinvesti bis-sħiħ fil-proġetti kapitali bl-iskop li jinħoloq ix-xogħol, bil-familji tal-ħaddiema jgawdu dak li qalgħu mill-ħidma sfiqa li qed issir.

Biżżejjed wieħed isemmi l-proġett ta' Bieb il-Belt, il-proġett tal-pavimentar ġdid tat-toroq ċentrali tal-belt, il-lift tal-Barrakka, ir-restawr li beda fuq Sant'Iermu, ir-restawr fuq is-swar madwar il-Belt, ir-restawr tal-Berġa ta' Kastilja, ir-restawr ta' Bieb il-Vitorja, Pjazza San Ġorġ.

Il-Belt Valletta nbniet bl-iskop li tipproteġi l-kumplament tal-gżira. Illum il-Belt Valletta hija kalamita tal-qofol tal-politika u l-ekonomija ta' pajjiżna.

Ta' kuljum eluf ta' turisti jżuru 'l-Belt Valletta. Biżżejjed insemmi l-kważi 76,000 turist li żaru lill-pajjiżna tul l-ewwel 5 xhur ta' din is-sena permezz tal-cruise liners. Biżżejjed wieħed jinnota n-nofs miljun persuna li jżuru l-Kon-Katidral ta' San Ġwann. Dawn kollha jikkontribwixxu b'xi mod jew ieħor fl-ekonomija Maltija.

Dan il-Gvern irid ikompli jsaħħaħ din il-kalamita għat-turiżmu permezz ta' monumenti bħal pont ta' Sant'Iermu. Żgur li dan il-pont se jitniżżel bħala destinazzjoni unika li kull min iżur lill-pajjiżna jrid jesperjenzha – kemm għad-dehra spettakolari li joffri minn fuqu kif ukoll minħabba li ta' kull filgħaxija se jkun spettaklu minnu nnifsu.

Dan il-pont jinsab eżatt fil-bokka, mhux biss ta' l-aktar port bieżel f'pajjiżna iżda fl-isbaħ port fil-Mediterran. Il-pont reġa' nbena bħala aspirazzjoni li naffrontaw il-ġejjieni b'enerġija ġdida imma dejjem fuq il-valuri li sawwruna bħala poplu.

Dan il-Gvern qatt ma  beża' jaffronta l-futur u dejjem għamel dan b'enerġija ġdida għall-ġid tal-poplu kollu.