Imressaq il-qorti wara li nġurja u hedded uffiċjali tal-pulizija

Il-pulizija ressqet lil Kader Adam Outtara ta' 33 sena resident l-Fgura quddiem il-qorti preseduta mill-Maġistrat Giovanni Vella. Huwa kien akkużat li nhar id-29 ta' Mejju għal ħabta tas-sagħtejn ta' wara nofsinhar ġewwa l-Hanger Open Centre, limiti ta' Ħal Far f'Birżebbuġia nġurja u hedded diversi uffiċjali tal-pulizija u persuni nkarigati skond il-liġi minn servizz pubbliku bil-ħsieb li jbeżża'. 

Huwa kien akkużat ukoll talli attakka u għamel rezistenza bi vjolenza. Kien akkużat ukoll li ikkaġuna ġrieħi ta' natura ħafifa fuq erba' uffiċjali tal-Pulizija u talli kiser l-ordni u l-paċi pubblika b'għajjat u ġlied. Outtara jinstab mixli ukoll li m'obdiex l-ordnijiet tal-pulizijau li żamm mara arrestata u kkaġuna lil din il-mara isoffri biżgħa ta' vjolenza kontriha. 

Kader Adam Outtara kien mixli wkoll li nhar it-30 ta' Mejju fl-għassa tal-pulizija taż-Żurrieq attakka u għamel rezistenza bi vjolenza kontra persuni inkarigati skond il-liġi minn servizz pubbliku. 

Huwa wieġeb ħati tal-akkużi miġjuba kontrih u ngħata piena ta' disgħa xhur priġunerija. Il-prosekuzzjoni tmexxiet mill-Ispetturi Kevin Pulis u Priscilla Caruana.