Illum jintemm il-Festival Internazzjonali tal-Piroteknika

Il-Festival Internazzjonali tal-Piroteknika llum wasal fit-tielet u l-aħħar jum tiegħu, hekk kif illejla se titħabbar il-kamra tan-nar rebbieħa minn fost dawk kollha li pparteċipaw.

Dan il-festival internazzjonali, organizzat mill-Ministeru tat-Turiżmu, l-Ambjent u l-Kultura flimkien mal-Awtorita' Maltija għat-Turiżmu, beda nhar il-Ħadd li għadda u ra s-sehem ta' fabbriki tan-nar mill-Kanada, ir-Renju Unit, l-Awstrija, il-Kroazja, il-Polonja u naturalment minn Malta, bil-parteċipazzjoni tal-Kamra tan-Nar San Mikiel ta' Ħal Lija, li matul dawn l-aħħar jiem offrew spettaklu mill-aqwa fil-Port il-Kbir.

Imma l-festival ta' din is-sena kien wieħed speċjali, hekk kif għall-ewwel darba fl-istorja ta' Malta, f'pajjiżna ġie organizzat is-Simpozju Internazzjonali tal-Logħob tan-Nar, avveniment li jsir kull sentejn u li jlaqqa' l-aqwa fabbriki tan-nar minn madwar id-dinja. Dan wassal biex f'Malta l-ispettakli tan-nar jibdew minn ġimgħa qabel il-festival tal-Port il-Kbir, b'wirjiet pirotekniċi mifruxa madwar Malta u Għawdex.

U proprju llejla, li se jimmarka t-tmiem ta' dawn il-jiem mimlija spettakli pirotekniċi, wara l-għoti tal-premjijiet il-pubbliku se jkun jista' jsegwi gran final pirotekniku, imħejji mill-Kamra tan-Nar Taljana Parente, akkumpanjata minn siltiet mużikali.

 

(Ritratt: Trevor Sollars)