Il-każ tal-Avukat misjuba mejta fil-karozza

Il-Pulizija temmen li r-riżultati patologiċi jistgħu jagħtu żvolta fil-kaz tal-Avukat Margaret Mifsud, li nstabet mejta f'karozza f'Baħar iċ-Ċagħaq fl-20 t'April li għadda. Dawn ir-riżultati jistgħu sahansitra jwasslu biex ikun magħruf jekk kienx hemm xi ħadd fl-inħawi tal-mara dakinhar li nstabet mejta.

Aħna nfurmati li l-Mapistrat inkwerenti ta l-permess biex il-vittma tindifen, bil-funeral mistenni jsir il-Ġimgħa.

Minn informazzjoni li għandna, s'issa waslu r-riżultati ta' parti żgħira mit-testijiet li saru u qed isiru fl-Ingilterra. 

Tant huma importanti dawn it-testijiet li jistgħu ukoll jidentifikaw traċċi ta' trab li jista' jkun hemm fuq ħwejjeġ ta' individwu ma' traċċi ta' trab li seta' kien hemm fil-post fejn instabet l-avukat Mifsud.

L-eks raġel tal-vittma għadu fuq Police Bail u ta' spiss qed jiġi  interrogat, iżda minn dan il-lat il-Pulizija għadha 'l bogħod milli ssolvi l-każ. Nizar el Gadi, ta' 34 sena minn Tripli, kull darba qed jiċħad l-involviment tiegħu fil-każ, u għalhekk l-importanza kbira tat-testijiet forensiċi.

Il-Libjan, li bħalissa qed jgħix f'lukanda f'San Ġiljan, beda għaddej każ fil-Qorti fejn jinsab akkużat li għamel theddid u kkaġuna feriti ħfief fuq l-eks mara tiegħu.

L-Ispettur Elton Taliana qal li xi ġimgħat qabel mietet, l-Avukat Mifsud kienet għamlet rapport għandu fejn qalet li kienet ġiet mhedda mill-eks raġel tagħha.

L-Ispettur qal li l-mara kienet imbeżża' u fuqha kien innota ħafna marki ħomor. Iktar tard, tabib kien iċċertifika li xi ħadd kien qabad lil Mifsud minn għonqha, bħal meta wieħed irid jifga lil xi ħadd. 

L-Avukat Mifsud, li kienet mara ta' ftit kliem, kellha l-kustodja tat-tfal iżda baqgħet f'kuntatt mal-eks raġel tagħha biex dan ukoll ikollu aċċess għalihom.