Il-Ministeru tal-Affarijiet Barranin miftuħ għall-pubbliku

Il-Ministeru tal-Affarijiet Barranin matul il-jum tas-Sibt, se jkun qed jilqa' lil pubbliku ġewwa Palazzo Parisio fi Triq il-Merkanti, il-Belt Valletta, fejn uffiċjali tal-Ministeru se jkunu qed jilqgħu lil pubbliku u jiddiskutu magħhom l-politika barranija ta' pajjiżna. Dawk kollha li jattendu se jkollhom ċ-ċans wkoll li jsemmgħu leħinhom kif ukoll jaqsmu l-ideat tagħhom.

Anke matul il-jum tas-Ġimgħa 4 ta' Mejju, il-Ministeru kien miftuħ mid-9 ta' filgħodu sal-ħamsa ta' wara nofsinhar biex imbagħad għall-ħabta tat-tmienja nieqes kwart ta' filgħaxija ttella'  kunċert mużikali b'tifkira tal-President Emeritus Dr. Ċensu Tabone fi Triq il-Merkanti, quddiem il-Ministeru tal-Affarijiet Barranin. Dan il-kunċert kien miftuħ għall-pubbliku u kien mingħajr ħlas.

Preżenti għal dan il-kunċert kien hemm wkoll il-President Emeritus Eddie Fenech Adami u l-Viċi Prim Ministru u l-Ministru għall-Affarijiet Barranin Tonio Borg li fid-diskors tiegħu tkellem dwar il-ħidma siewja ta' Ċensu Tabone fil-politika.

Ċensu Tabone kien Segretarju Ġenerali tal-Partit Nazzjonalista', okkupa l-kariga ta' Viċi Kap tal-Partit bejn l-1972 u l-1976 u President tal-Eżekuttiv tal-Partit Nazzjonalista' bejn 1977 u l-1987.

Matul il-jum tas-Sibt il-Ministeru tal-Affarijiet Barranin se jkun miftuħ bejn id-disa' ta' filgħodu sas-siegħa ta' wara nofsinhar u se jitqassam ukoll materjal informattiv dwar il-ħidma tal-Ministeru matul dawn l-aħħar snin. 

Dan il-materjal informattiv se jinkludi wkoll tagħrif dwar il-politika barranija ta' Malta fosthom matul din il-leġiżlatura fejn matulha l-Gvern iffirma iktar minn 170 ftehim bilaterali, filwaqt li l-Ministeru tal-Affarijiet Barranin permezz tal-Ambaxxati Maltin madwar id-dinja għin f iktar minn 17-il elf każ ta' għajnuna mitluba minn ċittadini Maltin. 

L-għan prinċipali ta' din l-attivita' huwa li l-pubbliku Malti u Għawdxi jifhem aħjar x'servizzi u ħidma jista' joffri l-Ministeru tal-Affarijiet Barranin.