Iffirmat ftehim ta' proġett pilota biex jinġiebu 50,000 turist mill-Amerika t'Isfel lejn l-Ewropa

Waqt iż-żjara tiegħu f'pajjiżna il-Viċi President tal-Kummissjoni Ewropea Antonio Tajani ltaqgħa mal-Ministru  għat-Turiżmu, l-Ambjent u l-Kultura Mario De Marco fejn ġie ffirmat ftehim ta' proġett pilota li hu mmirat sabiex bejn din is-sena u s-sena 2013, jinġiebu mal-50,000 turist mill-Amerika t'Isfel, lejn il-pajjiżi tal-Unjoni Ewropea.

Fid-diskors tiegħu il-Ministru Mario De Marco, rringrazzja lil Antonio Taiani talli dejjem ra li jagħmel it-turiżmu bħala pilastru ta' kull pajjiż fl-Unjoni Ewropea speċjalment f'Malta.

Mario De Marco kompla jgħid li dan il-ftehim għandu żewġ għanijiet, li wieħed minnhom hu dak li jsaħħaħ s-settur tat-turiżmu mhux biss fl-Unjoni Ewropea imma anke f'Malta speċjalment bejn ix-xhur tax-xitwa li huma kkunsidrati bħala 'low season'. Huwa kompla jgħid li grazzi għall-iffirmar ta' dan il-proġett pilota pajjiżna se jkollu l-opportunita' li jidentifika swieq ġodda. 

Min-naħa tiegħu il-Viċi President tal-Kummissjoni Ewropea Antonio Tajani qal li t-turisti li se jiġu mill-Amerika t'Isfel l-aktar bejn ix-xhur ta' Ottubru u April, jkollhom opportunita' aħjar sabiex jitgħallmu l-lingwa Ingliża. Taiani sostna wkoll li l-Ewropa għandha tifhem li turisti mir-Russja u miċ-Ċina jistgħu jħallu effett pożittiv fuq l-ekonomiji tal-pajjiżi Ewropej u għalhekk għandha nindirizzaw anke t-turiżmu lejn u minn dawn il-pajjiżi. Antonio temm jgħid li fl-aħħar mill-aħħar l-importanti hu li jiżdiedu t-turisti f'pajjiżi tal-UE matul il-low season.