Fil-qilla tas-Sajf

Ninsabu fl-aqwa tal-istaġun tas-sajf u għaldaqstant, bħal kull sajf ieħor, fuq il-Gżejjer Maltin, ġieli jkun hemm jiem li fihom, ikun hemm mewġa ta' sħana. 

Matul dan l-istaġun, ħafna huma dawk li jagħżlu modi differenti kif iżommu lilhom infushom komdi mis-sħana tax-xemx.  

Ninsabu fil-qilla tas-Sajf u naturalment, ġranet xemxin b'temperaturi għoljin ma jonqsux.  Matul din il-ġimgħa, it-temperaturi fuq il-Gżejjer Maltin kienu kemmxejn aktar sħan mis-soltu, tant li kien hemm drabi fejn it-temperatura laħqet l-40 gradi celsius. 

F'dawn il-ġranet sħan ħafna huma ħafna dawk li jagħżlu li jqattgħu ġurnata fejn il-baħar, hemm oħrajn li minħabba impenji oħra jagħżlu modi differenti kif jiffriskaw  u jżommu lilhom infushom komdi mis-sħana, fosthom bibita friska mal-ħbieb jew kollegi tax-xogħol. 

Skont il-previżjonijiet tal-Uffiċċju Meterjoloġiku f'Ħal Luqa, fil-jiem li ġejjin, it-temperaturi se jibqgħu għoljin, tant li dawn se jkunu aktar minn 30 gradi celsius mentri l-indiċi UV se jkun 10. 

Tajjeb li wieħed jenfasizza, li minkejja f'dawn il-ġranet sbieħ wieħed għandu l-opportunita' li jgawdi dawn il-jiem, huwa daqstant importanti li wieħed jieħu l-prekawzjonijiet kollha biex jipproteġi ruħu mix-xemx.