Evarist Bartolo b'attakki personali fuq Richard Cachia Caruana u l-ġudikatura

Il-Partit Nazzjonalista fi stqarrija kkundanna l-attakki li d-Deputat Laburista  Evarist Bartolo għamel is-Sibt filgħodu fuq ir-Rappreżentant Permanenti ta' Malta fl-Unjoni Ewropea, Richard Cachia Caruana, u fuq il-ġudikatura, waqt programm fuq l-istazzjon Laburista.

Il-PN qal li l-Partit Laburista qed jimxi bi strateġija li jagħmel attakki sistematiċi biex jipprova jħammeġ lil min hu serju f'xogħlu u lil min qed jagħti kontribut siewi lill-pajjiż.

Joseph Muscat jipprova jilagħbha tal-moderat iżda fil-verita` dawwar lilu nnifsu b'estremisti u jħossu komdu b'dawk ta' madwaru jagħtuh il-pariri u jitkellmu f'ismu.

Dwar l-attakk tal-esponent ewlieni Laburista fuq Richard Cachia Caruana, il-PN qal li dan sar fl-istess żmien meta l-Kumitat Parlamentari għall-Affarijiet Barranin qed jisma' x-xhieda dwar mozzjoni li saret fuq premessi żbaljati u tressqet mid-Deputat Laburista George Vella li kien għajjar lill-istudenti Maltin 'faxxisti, ħamalli, injoranti, arroganti, baxxi, mhux superjuri u abjetti'.

Fl-istess programm Evarist Bartolo fetaħ attakk ukoll fuq il-ġudikatura, bil-PN jgħid li dan juri li l-Labour m'għandux rispett lejn l-istituzzjonijiet indipendenti ta' pajjiżna. Ma jemminx li l-ġudikatura qegħda hemm biex tħares id-drittijiet taċ-ċittadini u l-attakki li saru fuq il-ġudikatura juru sa liema livell kapaċi jasal il-Labour.

Il-PN qal li jistenna li anke l-Mexxej Laburista Joseph Muscat jikkundanna dawn l-attakki ta' Evarist Bartolo.

Sadattant, ir-Rapprezentant Permanenti ta' Malta għall-Unjoni Ewropea, Richard Cachia Caruana se jippreżenta kawża ta' libell kontra d-Deputat Laburista Evarist Bartolo.

Dan intqal fi stqarrija maħruġa mir-Rappreżentanza Permanenti ta' Malta għall-Unjoni Ewropea fejn intqal ukoll li waqt programm fuq l-istazzjon tal-Partit Laburista, Evarist Bartolo irrikorra għal ġideb sfaċċat biex għamel attakk personali fuq ir-Rappreżentant Permanenti ta' Malta għall-Unjoni Ewropea.

Fl-istqarrija intqal li f'dan l-attakk personali, Evarist Bartolo qabeż kull limitu. L-attakk li sar fuq Richard Cachia Caruna jingħaqad ma' sensiela li saru fl-aħħar jiem minn Deputati Laburisti oħra fuq il-mezzi tax-xandir tal-Partit Laburista.