Bidliet pożittivi li ġabet magħha l-Liġi tal-Edukazzjoni

Fil-bidu ta' dan ix-xahar daħlu fis-seħħ il-bidliet li ġabet magħha l-Liġi ġdida tal-Edukazzjoni li fost l-oħrajn wasslu biex il-Kunsill Studenti Universitarji kompla jsaħħaħ il-vuċi tiegħu fl-Universita' b'żieda fir-rappreżentanza tal-istudenti.

Għall-KSU din hija forma tajba, li kienet mistennija, u li se twassal għal formazzjoni aktar sħiħa u ħolistika fil-livell terzjarju.

Il-KSU saħaq li bis-saħħa ta' din ir-riforma r-rappreżentanza tal-istudenti saret aktar inklussiva fejn aktar studenti jistgħu jipparteċipaw u jsemmgħu aktar leħinhom fuq affarijiet li jolqtu lilhom fl-Universita'.

Il-liġi l-ġdida approvata mill-Parlament ġabet magħha żieda ta' rappreżentant tal-istudenti fil-Kunsill, żieda ta' rappreżentant tal-istudenti fis-Senat u żieda ta' rappreżentant tal-istudenti fil-bord ta' kull fakulta'. B'hekk l-istudenti huma rappreżentati aħjar f'kull livell tal-Universita'.

Il-KSU fi stqarrija qal li l-Att dwar l-Edukazzjoni ġab miegħu ukoll titjib ieħor, speċjalment fejn għandu x'jaqsam mal-kwalita' tal-edukazzjoni, r-regolamenti dwar l-akkreditazzjoni u r-rikonoxximent tat-tagħlim informali u formali.

Il-Kunsill qal li qed iħares 'il quddiem biex ikompli jagħti l-kontribut tiegħu għal aktar titjib, b'mod partikolari għat-tisħiħ tal-vuċi tal-istudent bħala sieħeb fl-edukazzjoni ogħla. Skont il-KSU, dawn l-emendi se jwasslu għal esperjenza aħjar ta' tagħlim fit-tul, u finalment sistema edukattiva inklussiva aktar milli għandna llum.