Angelina Jolie u Jessica Parker l-aktar nisa mħallsa f'Hollywood

Angelina Jolie u Sarah Jessica Parker huma l-aktar żewġ attriċI li huma mħallsa f'Hollywood b'kull waħda ddaħħal 30 miljun dollaru. Dan jirriżulta skont ir-rivista prestiġjuża finanzjarja Forbes.

Jolie spiċċat fil-quċċata, grazzi għas-suċċess tal-films tagħha Salt li daħħal 300 miljun dollaru mis-swali taċ-ċinema, u The Tourist li daħħal 280 miljun dollaru.

Ħafna mill-qligħ ta' Parker ġej mir-ripetizzjonijiet tas-sensiela televiżiva Sex and the City li fiha kellha l-parti tal-protagonista. Dan minbarra l-qligħ mit-tieni film għaċ-ċinema bażat fuq din is-serje. Intqal ukoll li Jessica Parker iddaħħal ħafna flus mill-fwieħa tagħha kif ukoll mir-riklami li tidher

Jennifer Aniston u Reese Witherspoon ukoll għamluha fil-lista b'kull attriċi iddaħħal 28 miljun dollaru. Is-sena l-oħra l-attriċi li kienet taqla' l-aktar flus kienet Sandra Bullock li issa spiċċat fid-disa' post bi dħul ta' 15-il miljun dollaru.