Rebecca BORG
20 ta' Lulju, 2012
17:24 CET |
Bejn Jannar u Ġunju ta' din is-sena, il-Ministeru għal Għawdex iġġenera madwar 30% tal-elettriku jew daqs kemm jikkunsmaw elettriku madwar 20 familja f'sena permezz ta' sistema ta' pannelli fotovoltajċi installata fuq il-bejt tal-Ministeru għal Għawdex li b'kollox iġġenerat aktar minn 40 elf unit tal-elettriku.
Dawn il-pannelli għandhom il-kapaċita' li jiġġeneraw erba' darbiet aktar elettriku milli kien jiġi ġġenerat qabel. Din kienet l-ewwel inizjattiva tax-xorta tagħha li ġiet meħuda minn entita' tal-Gvern. Dan għax ġie deċiż li l-flus iffrankati mill-konsum tal-elettriku jiġu investiti f'aktar pannelli biex aktar ma jgħaddi ż-żmien, tikber is-sostenibilita' fl-użu ta' enerġija minn sorsi alternattivi.
Hu stmat li sal-aħħar ta' din is-sena, is-sistema se tkun qed tiġġenera nofs tal-elettriku kollu li jkun ikkunsmat. Dan permezz ta' żieda ta' aktar pannelli li se jiġu nstallati fuq il-bqija tal-bejt tal-Ministeru fix-xhur li ġejjin.
Dan kollu, kif spjegat il-Ministru għal Għawdex Giovana Debono, jikseb relevanza akbar fil-kuntest tal-miri ewlenin marbuta mal-pjan t'azzjoni dwar Eko-Għawdex.
Inizjattivi oħra ta' dan il-Ministeru marbuta ma' dan il-pjan t'azzjoni jinkludu studju dettaljat dwar il-possibilita' li jiġu nstallati aktar sistemi li jiġġeneraw l-elettriku mix-xemx fuq bini amminstrattiv u bini ieħor tal-Gvern inkluż skejjel u l-isptar Ġenerali t'Għawdex. Permezz ta' dan l-istudju ġew approvati żewġ proġetti estensivi li bejniethom se jiswew investiment ta' madwar €11-il miljun bl-għajnuna ta' fondi Ewropej.
Il-Ministru semmiet ukoll kif f'dawn l-aħħar ħames snin, aktar minn 1,700 familja bbenefikaw minn sussidju ta' kważi €2 miljun wara li pparteċipaw fl-iskemi tal-Gvern marbuta mal-installazzjoni ta' pannelli fotovoltajċi jew solar water heaters. Residenti Għawdxin li jbiegħu l-elettriku fuq il-grid igawdu wkoll minn rata ogħla ta' 28 ċenteżmu għal kull unit.
|
sezzjoni: Għawdex
Ċentri tas-saħħa
