3.500 tifel u tifla jipparteċipaw fi skolasajf

Madwar 3,500 tifel u tifla mill-iskejjel tal-Gvern, tal-knisja u indipendenti mistennija jipparteċipaw fi Skolasajf ta' din is-sena. 

Se jieħdu sehem ukoll 200 student Universitarju li qed isegwu korsijiet fil-Fakulta' tal-Edukazzjoni u anke 120 Kap ta' Skola, Assistent Kap jew għalliema bħala koordinaturi fiċ-Ċentri ta' Skolasajf.

L-Assistent Parlamentari fil-Ministeru tal-Edukazzjoni u x-Xogħol Stephen Spiteri nieda l-edizzjoni ta' Skolasajf ta' din is-sena fil-Guardian Angel Resource Centre fi ħdan il-Kulleġġ San Gorg Preca fil-Ħamrun.

Skolasajf din is-sena se tibda l-Erbgħa 18 ta' Lulju u se tibqa' għaddejja sal-Ġimgħa 7 ta' Settembru kuljum mit-Tnejn sal-Ġimgħa bejn id-9 ta' filgħodu u nofsinhar.

Il-programm ta' Skolasajf se jkun miftuħ għat-tfal tar-raba', il-ħames u s-sitt klassi tal-iskejjel primarji kollha. Iċ-ċentri ta' Skolasajf huma mqassmin madwar Malta u Għawdex.

It-tema prinċipali ta' Skolasajf magħżula għal din is-sena hi 'Solidarjeta b'impenn'. Dan biex tikkommemora s-Sena Ewropea iddedikata lill-Anzjanita' Attiva u s-Solidarjeta' bejn il-Ġenerazzjonijiet.

Tfal li jattendu ċ-Ċentri ta' Riżorsi se jkollhom programmi apposta għalihom.

Barra minn hekk se jkun hemm ukoll programm magħruf bħala Klabbsajf għal dawk it-tfal li tul is-sena skolastika jingħataw servizz ta' għajnuna kumplimentari fil-litteriżmu.

L-applikazzjonijiet għal Skolasajf jistgħu jinkisbu mill-iskejjel primarji tal-istat. Imbagħad għandhom jaslu fl-iskejjel fejn it-tfal se jattendu sa mhux aktar tard mill-Ħamis 31 ta' Mejju.