L-istqarrija tal-MUMN huwa attakk mimli falzitajiet

Il-Ministeru għal Għawdex iddeskriva l-istqarrija tal-MUMN bħala attakk mimli falzitajiet u allarm irresponsabbli li minnu jbatu l-pazjenti. Il-Ministeru saħaq li s-servizzi li jingħataw mill-isptar huma tajbin u konformi mal-livelli stabbiliti fil-qasam tas-saħħa f'pajjiżna.

Tul dawn l-aħħar snin kompliet l-istqarrija, il-Ministeru għal Għawdex ħadem kontinwament sabiex jittejjeb is-sevizz tal-isptar f'Għawdex fosthom twaqqfet it-taqsima tal-CCU, tal-Ġinekoloġija, tat-tfal u l-maternita', sar ukoll rinnovament fis-swali ġenerali u fir-residenza Sant'Anna. Sar ukoll xogħol intensiv sabiex jitneħħew is-soqfa tal-asbestos u ristrutturar fit-taqsima tal-outpatients. 

Issemma' wjoll id-dipartiment il-ġdid tar-Radjoloġija fejn pazjenti li sa ftit żmien ilu kellhom imorru Malta għall-kura, illum  jistgħu jirċievu l-mard tal-kanċer speċjalment jekk għandhom bżonn jagħmlu CT scans issa jistgħu jagħmluh b'mod regolari. Fil-ġimgħat li ġejjin sa jibda jingħata s-servizz tal-bone density flimkien mal-bidu tar-ristrutturar fl-iswali tal-operazzjonijiet fejn inxtara apparat ġdid u ta' kwalita' mill-aqwa.

Dan l-investiment kollu, fi kliem il-Ministeru, kompla jtejjeb is-servizzi għall-pazjenti , l-istaff mediku, paramediku u ħaddiema oħra fl-isptar. Dan it-titjib, kompla l-Ministeru qed ikunu koordinati sabiex is-servizzi tal-isptar jibqgħu għaddejjin mingħajr ma jkunu sospiżi – mertu ta' ħidma li tifttex bilanċ bejn l-interessi tal-pazjenti u l-ħaddiema fl-isptar. Minbarra s-servizzi mediċi, hu mistenni li jiżdiedu wkoll l-infermiera.

Għalhekk il-Ministeru għal Għawdex jixtieq iserraħ lill-pubbliku Għawdxi li s-servizzi tal-isptar Ġenerali ta' Għawdex joffri s-servizzi tiegħu b'mod regolari, responsabbli u professjonali mill-ħaddiema kollha tal-isptar, kif dejjem ingħataw. Għaldaqstant fl-Isptar Ġenerali ta' Għawdex ma hemm l-ebda periklu, għal kuntrarju ta' kif ġie allegat mill-istqarrija tal-MUMN.

Il-Ministeru għalaq l-istqarrija tiegħu billi rringrazzja lill-ħaddiema kollha tal-isptar għas-servizz dedikat tagħhom għall-ġid tal-pazjenti.