Żewġ appartamenti li se jakkomodaw tfal u żgħażagħ li m'għandhomx fejn joqgħodu

Dar San Ġużepp f'Santa Venera varat proġett ġdid li se jservi ta' benefiċċju għar-residenti ta' din id-dar hekk kif ġew inawgurati żewġ appartamenti li se jakkomodaw tfal u żgħażagħ li m'għandhomx fejn joqgħodu.

Dan il-proġett kien possibbli bl-għajnuna tal-ġenerożita' tal-poplu Malti u diversi kumpaniji kummerċjali, li permezz tieghu ir-residenti ta' din id-dar se jkollhom l-opportunita' li jibqaw jghixu hemm wara li jghalqu t-tmintax -il sena.

Fil-preżenza tal-Arċisqof ta' Malta Pawlu Cremona, id-Direttur ta' din id-Dar Fr. Frankie Cini tenna li dan il-proġett ħoloq ambjent aħjar fejn il-Knisja tkun tista' tieħu aktar ħsieb il-persuni vulnerabbli fis-soċjeta'.

Huwa faħħar ukoll il-ġenerożita' tal-pubbliku, ħaġa essenzjali biex dan il-proġett seta' jsir realta'.

Dan il-proġett huwa maqsum f'żewġ appartamenti, wieħed għal tfal li ma' jsibux fejn joqgħodu fi tmiem il-ġimgha u ieħor għal żgħażagħ ta' il-fuq minn 15-il sena. Dan tal-aħħar se jkollu programmi speċjali biex iż-żgħażagħ ikunu preparati b'mod aħjar għall-ħajja adulta.  

Dan il-proġett, li tlesta fi żmien 15-il xahar, kien possibbli permezz tal-għajnuna ta' bosta entitajiet kummerċjali kif ukoll bil-fondi li nġabru fil-maratona 'Oħloq Tbissima' u b'għotja mill-Awtorita' tad-Djar. Parti importanti ta' dan il-proġett saret bis-sehem tal-voluntiera minn kull qasam tas-soċjeta, inkluż grupp mill-Istat ta' Oregon fl-IStati Uniti.

Dan il-proġett ġie inawgurat lejliet il-102 anniversarju mill-bidu ta' din id-dar, meta Monsinjur Giuseppe de Piro fetaħ din id-dar biex jgħin tfal fil-bżonn.