Ċerimonja b'tifkira ta' tliet vittmi tal-gwerra

Tmien membri mill-Metropolitan Police ta' Surrey fir-Renju Unit ħadu sehem f'ċeremonja f'Malta organizzata mir-Royal Air Force Association, li matulha tfakkru l-bdoti tal-Commonwealth li mietu fl-azzjoni 70 sena ilu. 

Il-pulizija Ingliżi, li kienu Malta fuq stedina tas-Sezzjoni Maltija tal-Assocjazzjoni Internazzjonali tal-Pulizija, fakkru tliet membri tagħhom li servew f'Malta meta kienu bdoti voluntieri matul it-Tieni Gwerra Dinjija. Clive Nibbs, Wilfred Pickard u Eric Woods ħallew il-bażi tagħhom fir-Renju Unit u qatt ma rritornaw lura.

L-attivita' bdiet minn ħdejn il-Palazz fejn membri mill-Banda tal-Pulizija, immexxija mis-Surġent Dennis Agius, immarċjaw tul Triq ir-Repubblika sa quddiem il-Monument tal-Gwerra, il-Furjana. Warajhom immarċjaw il-Pulizija minn Surrey immexxija mill-Ispettur Duncan Calder u s-Surġent Christian Duckett.

Quddiem il-Monument tal-Gwerra tqiegħdet kuruna segwita b'salut mill-kontinħent preżenti. Minn hemm, il-bandisti tal-Pulizija flimkien mal-kollegi Ingliżi pproċedew lejn il-Monument tar-Royal Air Force fejn saret it-tifkira proprja.

Preżenti għal din l-okkażjoni annwali kien hemm fost oħrajn, il-President ta' Malta George Abela, il-Kmandant tal-Forzi Armati ta' Malta l-Brigadier Martin Xuereb, numru ta' Ambaxxaturi akkreditati f'Malta, veterani tal-gwerra kif ukoll membri mis-Sea Cadets ta' Malta.

L-Ispettur Duncan Calder kien kburi għax ingħata ġieħ lil tliet membri mill-Pulizija Metropolitana ta' Surrey li servew f'Malta kontra l-ghadu faxxista u nazista.

Fiċ-ċerimonja sar talb minn Fr. Jeffrey Williams mill-Knisja Anglikana f'Malta segwit bid-daqq tal-Last Post u d-daqq ta' fanfarra minn żewġ trumbettieri tal-Armata. It-tifkira ntemmet bit-tqegħid tal-kuruni quddiem il-monument tar-Royal Air Force.