foreign@media.link.com.mt
16 ta' Marzu, 2010
19:47 CET |
Hemm tħassib dwar sparatura quddiem il-bażi ewlenija spazjali Indjana li tinsab f'Byalalu barra l-belt ta' Bangalora.
L-isparatura kienet waħda qasira u fiha ħadu sehem żewġt irġiel li ma nqabdux. Intqal li żewġt irġiel intlemħu jaġixxu b'mod suspettuż ħdejn il-bażi u Pulizija marru jaraw x'qed jagħmlu u kien dan il-ħin li nfetaħ in-nar u ħarbu mill-post.
Din il-bażi suppost hi mgħassa sew peress li l-Gvern iqisha bħala mira potenzjali għall-militanti fil-pajjiż u dan l-aħħar is-sigurtà ssaħħet madwar il-bini marbut mal-proġett spazjali Indjan wara twissijiet li fuq xi wħud minnhom jistgħu jsiru attakki terroristiċi.
Il-Pulizija Indjana qalet li s'issa ma tafx min seta' kien wara dan l-attakk. Palaniappan Chidambaram, il-Ministru tal-Intern, qal li s'issa mhux magħruf min kien wara l-attakk iżda jidher li l-irġiel li fetħu n-nar kienu libsin speċi ta' uniformi. Hu iżda qal li l-attakk ma tantx kien ippjanat tajjeb u ma kienx hemm lok ta' allarm.
Fl-Indja, il-forzi tas-sigurtà bħalissa jinsabu fuq allert massimu wara li x-xahar li għadda bomba qatlet 16-il persuna. Uffiċjali Indjani qalu li dan l-attakk kien xogħol militanti Indjani b'rabtiet mal-militanti fil-Pakistan. L-Indja spiss takkuża lill-Pakistan li mhu qed jagħmel xejn biex irażżan l-attakki minn militanti bbażati hemmhekk.
|
