foreign@media.link.com.mt
16 ta' Marzu, 2010
19:37 CET |
Il-Portugall, taħt pressjoni kbira biex jirranġa s-sitwazzjoni finanzjarja tal-pajjiż, ħabbar sensiela ta' miżuri ta' privatizzazzjoni li se jeffettwaw il-linja tal-ajru nazzjonali, it-trasport bil-ferroviji, is-servizz postali, l-enerġija u l-industrija tal-karta.
Fost il-miżuri li tħabbru hemm ukoll l-attività Bankarja tal-Gvern u tal-assigurazzjoni. Il-mira hi li mill-privatizzazzjoni l-Gvern idaħħal madwar sitt biljun ewro sal-2013 bi 1.2 biljun ewro mistennija jinġabru din is-sena u 1.8 biljun is-sena d-dieħla qal il-Gvern.
Bħalissa d-dejn pubbliku tal-Gvern Portugiż hu ta' 142.91 biljun ewro. Il-privatizzazzjoni li se ssir hu mistenni li tnaqqas id-dejn b'madwar 4.19%. Il-miżuri tħabbru minn Fernando Teixeira Santos, il-Ministru tal-Finanzi Portugiż, waqt laqgħa tal-Ministri tal-Finanzi Ewropej fi Brussel.
Biex jipprova jirranġa s-sitwazzjoni, il-Gvern Soċjalista Protugiż għandu l-intenzjoni jbigħ partijiet kbar tal-ekonomija tal-pajjiż. Hemm ħafna tħassib li l-Portugall jinsab miexi fl-istess direzzjoni tal-Greċja.
Il-Portugall għandu żbilanċ fil-finanzi pubbliċi ta' 8.3% u l-mira hi li sal-2013 dan jinżel għal 2.8%. Xi ħaġa li osservaturi jsostnu hu diffiċli ħafna li jitwettaq. Dan hekk kif fil-pajjiż hemm l-ogħla rata ta' qgħad għal ħafna snin kif ukoll ċifri li ħarġu l-ġimgħa li għaddiet urew li l-ekonomija fl-aħħar tliet xhur tas-sena li għaddiet trażżnet bi 0.2%.
|
