Ingrid FENECH
8 ta' Frar, 2010
19:34 CET |
Xalata ta' mużika sagra, kontemporanja u klassika, dan kollu se jagħmel parti mill-kunċert spettakolari tal-grupp mużikali Enkor li ilu għal dawn l-aħħar tmien snin jipprovdi wirjiet brillanti ta' kant u mużika varjata taħt id-direzzjoni ta' Johanna Van Lent-Singels.
B'enfażi fuq il-mużika klassika, l-aktar b'tema spiritwali, dan il-grupp sar popolari minħabba l-mod innovattiv u mexxej li bih is-37 kantant u 6 mużiċisti li jiffurmawh jinterpretaw is-siltiet mużikali tagħhom.
Wara s-suċċess li kiseb il-kunċert mużikali ta' dan il-grupp sentejn ilu, id-dilettanti kollha tal-mużika fil-5 u s-6 ta' Marzu li ġej se jerġa' jkollhom l-opportunità li jgawdu żewġ serati divertenti ta' mużika fis-Sala Sir Temi Zammit fl-Università ta' Malta.
Waqt konferenza tal-aħbarijiet, il-maniġer tal-kor Charles Ellul ta d-dettalji dwar dan il-kunċert oriġinali u ħabbar li l-isem tal-ispettaklu se jkun Get Together, isem li jindika l-istil ta' dan il-kor, fejn il-parteċipazzjoni sħiħa tal-udjenza waqt il-kunċert hija simbolika mal-istil tal-kunċerti u l-wirjiet li taw matul is-snin.
|
