Dione BORG
8 ta' Frar, 2010
19:01 CET |
Il-Kunsill Lokali tal-Furjana se jerġa' jorganizza l-festival nazzjonali tal-logħob tal-art mekkanizzat fuq il-Fosos tal-Furjana nhar is-Sibt 24 ta' April lejliet il-festa ta' San Publju.
Dettalji dwar dan il-festival ingħataw f'konferenza tal-aħbarijiet mis-Sindku Nigel Holland li spjega kif tul l-aħħar erba' snin dan il-festival stabilixxa ruħu sew fost id-dilettanti tal-logħob tan-nar u sar attrazzjoni unika għat-turisti.
F'din l-edizzjoni tal-festival se jipparteċipaw 10 kumplessi jew għaqdiet tan-nar li se jesebixxu l-aqwa xogħlijiet mekkanizzati tagħhom fl-istess avveniment li se jibda fl-10.30 ta' bil-lejl.
Kif isir kull sena, il-ġurija f'dan l-avveniment se tkun barranija imma se tkun immexxija minn Michael Brockdorff, espert piroteniku Malti. Il-ġurija se tinkludi wkoll piroteniku internazzjonali, inġinier mekkaniku mill-Ġermanija.
Din se tkun qed tevalwa diversi aspetti tal-logħob tan-nar mekkanizzat li jinkludu l-aħjar mekkaniżmu, l-aħjar xogħol bil-ktajjen, l-aħjar prodotti pirotekniċi wżati u l-aħjar esebizzjoni oriġinali.
Il-ġurija se tevalwa wkoll ix-xogħol b'mod ġenerali, kemm waqt li l-esebizzjoni kif ukoll waqt l-armar.
Dawn l-elementi kollha għandhom iwasslu għall-verdett finali bir-riżultati jitħabbru l-għada tal-festival, il-Ħadd 25 ta' April f'nofsinhar.
Il-pubbliku wkoll jista' jipparteċipa fl-għażla tar-rebbieħ billi jibgħat sms għall-kumpless li fl-opinjoni tiegħu, l-aktar li jkun impressjonah fil-festival.
|
