Is-Sejf ta' La Vallette fil-Kremlin

Il-famuż sejf li flimkien max-xabla tal-Gran Mastru La Vallette jinsab għall-wiri fil-Louvre, fi Franza, bħalissa jinsab għall-wiri fil-Kremlin flimkien ma' numru ta' oġġetti ta' valur storiku oħrajn li nġabru kemm minn mużewijiet f'Malta kif ukoll minn mużewijiet barra minn Malta.

Il-wirja qed tittella' mill-Mużewijiet tal-Kremlin f'kollaborazzjoni mal-ambaxxata tal-Ordni Sovrana Militari ta' Malta fir-Russja u qed issir bl-għan li tkun esebita r-relazzjoni bejn l-Ordni u r-Russja. Infatti, il-wirja qed tikkommemora l-għoxrin anniversarju mit-twaqqif tar-relazzjonijiet bejn il-Federazzjoni Russa u l-Ordni b'mod uffiċjali. 

Iktar minn ħamsa u għoxrin fil-mija tal-oġġetti kollha ġejjin mill-kollezzjoni ta' Heritage Malta, speċjalment mill-Armerija fil-Palazz Presidenzjali, mill-Mużew tal-Arti u mill-Mużew Marittimu. Hemm esebiti wkoll xi dokumenti mportanti mislufa mill-Librerija ta' Malta. Fl-esebizzjoni hemm koll pittura ta' Antonio Martelli, mpittra mill-magħruf Caravaggio.

Ir-relazzjoni bejn l-Ordni ta' San Ġwann u r-Russja tmur lura sal-1698, matul il-ħakma tal-Granmastru Perellos u wara l-waqa' ta' Malta f'idejn il-Franċiżi, It-Tsar Russu Pawlu l-Ewwel offra li jospita lil xi Kavallieri tal-Ordni. 

Il-wirja kienet inawgurata fil-5 ta' Lulju 2012 mill-Granmastru tal-Ordni Fra Matthew Festing u mill-Ministri tal-Kultura tal-Federazzjoni Russa, Vladimir Medinskiy. L-esebizzjoni tagħlaq fid-9 ta' Settembru 2012. Skont informazzjoni li għandu dan il-ġurnal, eluf ta' persuni qed iżuru l-wirja kuljum.