Magħżula Miss Olokawst fl-Iżrael

Tista' tinstema' bħala ċajta bla gost imma fl-Iżrael għadha kif ġiet inkurunata Miss Olokawst. Madwar 300 mara, bejn 74 u 79 sena li salvaw mill-kampijiet tal-konċentrament ipparteċipaw f'dan il-beauty pageant uniku, fejn ir-rebbieħa ingħatalha kuruna u faxxa. 

 

Kien hemm kritika qawwija kontra din il-kompetizzjoni, li ġiet deskritta bħala makabra minn Colette Avital president ta' għaqda iżraeljana li tirrappreżenta l-familjari tal-vittmi  tal-olokawst. Imma minn naħa l-oħra, l-organizzatur tal-kompetzzjoni, Simon Sabag qal li r-rebbieħa tal-kompetizzjoni jintgħażlu skont l-esperjenzi tagħhom kif għexu tul u wara l-gwerra, fejn is-sbuħija fiżika hija element minuri ta' din il-kompetizzjoni. L-organiżżatur żied jgħid li l-fatt li kien hemm konkorrenza qawwija għal din il-kompetizzjoni turi li hemm ħafna persuni lesti jipparteċipaw f'din il-kompetizzjoni.

 

Għall-premjazzjoni kien hemm preżenti żewġ ministri tal-gvern Iżraeljan, Moshe Kahlon u Yossi Peled u l-ġurija kienet magħmula minn tlett rebbieħa ta' Miss Iżrael u psikjatra. Din il-ġurija għażlet lil Hava Hershkovitz  ta' 79 sena u mwielda r-Rumanija bħala Miss Olokawst.