Ray ABDILLA
29 ta' Lulju, 2010
16:14 CET |
Il-Qorti ppreseduta mill-Maġistrat Laurence Quintano kkundannat żewġ persuni minn Ħal-Qormi għal sentenza ta' ħabs sospiża wara li attakkaw ħaddiem li kien qed jobdi ordni mogħtija mis-superjuri tiegħu u jwaħħal tabella fi triq l-Imdina f'Ħal-Qormi stess. Il-vittma kien Carmelo Galea li waqt li kien qed jagħmel xogħlu qala' xebgħa u spiċċa b'ferita f'wiċċu.
Dan il-każ seħħ fis-17 ta' Mejju ta' tliet snin ilu, fejn Carmelo Galea u ċertu Edward John Galea kienu qegħdin iwaħħlu xi sinjali tat-traffiku. Joe Said, ta' 56 sena, kien ikkundannat sena ħabs sospiża għal erba' snin filwaqt lin-neputi tiegħu Justin Said, ta' 29 sena, kien ikkundannat tliet xhur ħabs sospiżi għal sena.
Fil-ħin li l-ħaddiema kienu qegħdin iwaħħlu t-tabelli, Joe Said ħareġ minn showroom u talab li Edward John Galea biex ma jwaħħalx it-tabella fil-post. Dan wieġbu li din ma kenitx deċiżjoni tagħhom, u Carmelo Galea, li kien miegħu, kompla bix-xogħol. Joe Said ipprova jipperswadi lil Carmelo Galea sabiex is-sinjal tat-traffiku ma jitwaħħalx.
Dan qallu li huma kienu qed jimxu skont il-pjanta tal-perit, u dak il-ħin Joe Said intilef u rrisponda billi tah daqqa ta' ponn. Dan kellu jittieħed l-Isptar minħabba l-ġrieħi li ġarrab. Joe Said, fil-Qorti, qal li Carmelo Galea kien għajru 'ballotra' u 'melħa' u meta resaq lejh biex ikellmu dan kien imbuttah. Justin Said qal li Carmelo Galea kien imbotta lil zijuh, li imbagħad kien tah daqqa ta' ponn. Justin Said qal ukoll li l-uniċi daqqiet li qala' l-vittma kienu minn għand zijuh.
Meta xehed il-vittma Carmelo Galea, huwa qal li waqt li kien qed iwaħħal is-sinjali tat-trafiku, Joe Said beda jgħajjat u qal li ma jridx jara permessi. Dak il-ħin waslu żewġ minibuses u minn waħa minnhom niżel Justin Said. Kien Joe Said li tah bil- ponn fejn kissirlu n-nuċċali f'għajnejh. Qal li sadanittant kif kien qiegħed ineħħi n-nuċċali u l-ħġieġ minn għajnejh, qabżu erba' persuni fuqu, fosthom Justin Said, li bdew jagħtuh bis-sieq u bil-ponn fuq rasu u f'partijiet oħrajn ta' ġismu.
Huwa qal li anke qabdu l-kpiepel il-ħomor, li jkun fit-triq bħala sinjali li jkun qed isir xi xogħol fit-triq, u bdew jagħtuh bihom. F'ħin minnhom telgħu fil-minibus u reġgħu marru warjah u bdew isawwtuh. Skond il-vittma kemm Joseph Said u Justin Said kienu kienu fost dawk li bdew isawwtuh.
Il-Qorti qalet li mill-provi jirriżulta li ma hemm ebda dubju li kien Joe Said li ta d-daqqa ta' ponn lil Charles Galea li ġabet ferita gravi, filwaqt li qalet li dan ma kellux ebda raġuni għal li għamel. Jirriżulta wkoll li kemm Joseph Said kif ukoll Justin Said taw bis-sieq lil Charles Galea. Dwar Justin Said, il-Qorti qalet li dan kien fid-dmir li jikkwieta l-affarijiet u mhux ikompli jagħti bis-sieq.
Il-Prosekuzzjoni tmexxiet mill-Ispettur Marisa Camilleri.
|
