29 ta' Lulju, 2010
14:14 CET |
Il-Pulizija Franċiża qed izomm koppja arrestata wara s-sejba ta' tmien katavri ta' trabi tat-twelid. Il-koppja tressqet il-Qorti u nżammet arrestata.
Is-sejba makabra saret f'raħal qrib Lille, fit-Tramuntana tal-pajjiż, meta sidien ġodda ta' dar f'dan ir-raħal sabu l-fdalijiet ta' tarbija tat-twelid fil-ġnien u minnufih għarrfu lill-Pulizija bis-sejba tagħhom.
L-investigazzjonijiet wasslu għall-arrest ta' koppja, filwaqt li aktar stħarriġ u tfittxija bl-għajnuna tal-klieb tal-pulizija, wasslu biex instabu aktar katavri ta' trabi fid-dar fejn qed toqgħod preżentament din il-koppja.
L-eta' tal-koppja hi ta' madwar 45 sena u għandha kemm tfal adulti kif ukoll neputijiet. Il-mara ammettiet li qatlet lit-tmien uliedha u li ħbiet il-katavri tagħhom.
Dan il-każ fakkar f'żewġ każi oħra riċenti fi Franza, meta f'Marzu mara ammettiet li qatlet sitt itrabi tagħha u ħbiethom fil-kantina, filwaqt li mara oħra Franċiża nstabet ħatja li qatlet titt itrabi tagħha stess.
|
