Ray ABDILLA
29 ta' Lulju, 2010
13:06 CET |
Raphael Degiorgio ta' 43 sena mill-Isla kien ikkundannat sitt xhur ħabs sospiżi għal sena wara li nstab ħati li sawwat lill-ex mara tiegħu u lis-sieħeb tagħha, b'dan ta' l-aħħar isofri ferita gravi li tista twassal għal difett permanenti.
Degiorgio instab ħati mill-Maġistrat Audrey Demicoli li fit-23 ta' Frar ta' tliet snin ilu fi Triq il-Kbira, Ħal-Qormi mingħajr il-ħsieb li joqtol jew li jqiegħed l-ħajja ta' Joseph Fenech f'periklu ċar ikkaġuna ferita ta' natura gravi. Huwa nstab ħati wkoll li kkaġuna feriti ta' natura ħafifa fuq l-istess Joseph Fenech.
Huwa nstab ħati wkoll li għamel li għarraq ħwejjeg ħaddiehor, u li ħebb għal Joseph Fenech u Rachael Degiorgio sabiex jagħmillhom ħsara u li heddidhom. Instab ħati wkoll li kiser il-paċi pubblika u li dagħa.
L-inċident kien wieħed familjari li nqala' għall-ħabta tal-17:30. Fiż-żmien tal-inċident, l-imputat u l-mara, li għandhom tliet itfal, kienu legalment separati u mart Rachael Degiorgio kellha relazzjoni ma' certu Joseph Fenech.
Degiorgio u Fenech qalu fil-Qorti li huma kienu bil-vann ta' Fenech, ħerġin minn triq sekondarja għal fuq it-triq prinċipali. Fil-vettura magħhom kien hemm iben Degiorgio. Waqt li kienu qed jistennew biex joħorgu fit-triq prinċipali,
għadda Raphael Degiorgio bil-vann tiegħu, waqaf u mblukkalhom it-triq. Wara niżel mill-vettura tiegħu b'pajp b'biċċa ħadida mat-tarf tiegħu f'idejh u beda jagħti bih fuq il-vettura ta' Fenech.
Fenech qal li niżel mill-vann tiegħu biex iwaqqfu, iżda Degiorgio qabad jagħti lilu u laqtu f'rasu. Fenech qal li wkoll li kien sofra xi ġriei f'għajnejh u f'idu l-leminija; minkejja dan, il-Qorti qalet li ma kienx hemm provi ta' dan.
Il-Prosekuzzjoni tmexxiet mill-Ispettur Marisa Camilleri.
|
