28 ta' Lulju, 2010
11:58 CET |
Suċċess kbir għall-kunċert 'Classics Under the Stars' hekk kif mijiet ta' Maltin attendew għal dan il-kunċert imtella' mill-Orkestra Filarmonika Nazzjonali. Kunċert li sar fil-Palazz tal-Girgenti u li kellu rispons qawwi mill-pubbliku – tant li kien fully booked sa minn jiem qabel.
L-orkestra, taħt id-direzzjoni tal-Mro. Michael Laus, allegrat lill-udjenza b'xogħlijiet popolari bħall-Overture Light Cavalry ta' Suppe, żifniet Ungeriżi ta' Brahms, siltiet mill-aktar opra famuża ta' Bizet, il-Carmen u l-Overture La Gazza Ladra ta' Rossini.
Ipparteċipat ukoll il-banda tal-Forzi Armati ta' Malta bl-għażla tal-mużika tirrifletti l-filosofija li din tkun esperjenza edukattiva u rikreattiva unika.
Għaldaqstant inkludiet uħud mis-siltiet l-aktar popolari fir-ripertorju klassiku ta' kull żmien.
Dan il-kunċert, li sar taħt il-patroċinju tal-Prim Ministru Lawrence Gonzi u s-Sinjura Kate Gonzi, huwa wieħed f'sensiela ta' inizjattivi li qed tieħu l-orkestra bl-għan li tgħolli l-profil tagħha mal-pubbliku ġenerali.
|
