Marion ZAMMIT
27 ta' Lulju, 2010
19:53 CET |
Il-vuċijiet tas-sopran Russa Yana Ivanova u tal-baritonu Malti Joseph Lia se jingħaqdu man-noti tal-pjanu li joħorġu mal-movimenti ta' subgħajn il-pjanista Russa Svetlana Magdalcuk f'kunċert klassiku li se jsir fis-Sagrestia Vault fil-Valletta Waterfront.
Iż-żagħżugħ Malti li ilu għal tliet snin jistudja l-vuċi fil-konservatorju Rimsky-Korsakov f'San Pietruburgu fir-Russja qed jerġa' għal sena oħra jippreżenta t-talent li qed jindokra f'kors intensiv ta' sitt snin. Dan is-sit żar waħda mis-sessjonijiet ta' provi ftit qabel il-kunċert tal-Erbgħa filgħaxija.
F'dan il-kunċert se jinstemgħu xogħlijiet minn għażla sħiħa ta' kompożituri fosthom Puccini, Verdi, Donizetti, Mozart, Schumann, Handel, Pergolesi, Varlamov, Tchaikovsky, Rimsky-Korsakov, Brahms u Gershwin.
Fl-istess Sagrestia Vault fil-Valletta Waterfront, bejn it-Tlieta u l-Erbgħa se tkun qed issir wirja b'xogħlijiet mill-artista Maltija Claire Ciantar.
|
