foreign@media.link.com.mt
16 ta' Marzu, 2010
20:15 CET |
Il-Prim Ministru Laburista Brittaniku Gordon Brown saħaq li beħsiebu jkompli bħala Kap tal-Partit Laburista (fil-Gvern) anki jekk tfallilu l-maġġoranza fl-elezzjoni ġenerali li jmiss. L-elezzjoni mistennija ssir f'Mejju u waqt li l-istħarriġ tal-opinjoni juri lill-Partit Konservattiv fl-Oppożizzjoni b'vantaġġ minimu fuq il-Laburisti tista' tinqala' sitwazzjoni fejn l-ebda mill-partiti l-kbar ma jikseb maġġoranza assoluta fil-Parlament.
Sadattant, meta l-ġurnalisti tal-BBC staqsewh jekk iħossux obbligat li jirriżenja f'każ li ma jiksibx maġġoranza "diċenti" fl-elezzjoni, Gordon Brown wieġeb li "għandu obbligu lejn in-nies li jkompli u jikkonkludi l-ħidma biex il-pajjiż joħroġ mir-riċessjoni finanzjarja diffiċli".
Fil-fatt, Brown insista li "se jkompli għaddej għaliex irid il-maġġoranza warajh", bil-Konservattivi, min-naħa tagħhom, qed jippruvaw itemmu tlettax-il sena konsekuttivi ta' amministrazzjoni Laburista. F'każ li ħadd ma jikseb maġġoranza fl-elezzjoni, il-partit bl-akbar numru ta' siġġijiet jista' jipprova jmexxi bl-appoġġ tal-minoranza aktar milli jipprova jgħaqqad koalizzjoni - mbagħad isejjaħ elezzjoni oħra (aktar 'il quddiem fis-sena) ħalli jaċċerta minn maġġoranza.
Gordon Brown, bħalissa, jinsab taħt pressjoni biex jiddettalja l-pjani tal-Gvern Laburista tiegħu fir-rigward ta' żbilanċ rekord. U filwaqt li ammetta dwar l-inċertezza ekonomika fir-Renju Unit, il-Prim Ministru Laburista qed jisħaq li ladarba jitħabbar il-Baġit fl-24 ta' Marzu għandha toħroġ "aktar informazzjoni" dwar l-imħabbra qtugħ fl-infiq tal-Gvern li fost oħrajn tolqot lis-salarji tal-ħaddiema mas-settur pubbliku.
"Hemm l-inċertezza dwar x'wieħed jista' jagħmel fil-futur minħabba dak li qed jiġri rigward il-qgħad, ir-rati tal-interessi fuq id-djun u l-iżvilupp tal-ekonomija," saħaq Brown waqt li kien qed iwieġeb il-mistoqsijiet tal-ġurnalisti. Il-Partit Laburista fil-Gvern u l-Konservattivi t-tnejn qalu li huma impenjati biex jindirizzaw l-iżbilanċ tar-Renju Unit li din is-sena jista' jaqbeż it-tnax fil-mija tal-Prodott Gross Domestiku (GDP).
Madankollu, iż-żewġ partiti ma jaqblux dwar iż-żmien opportun għal azzjoni iebsa u deċiżiva li 'l quddiem isservi ta' stimolu għall-ekonomija.
|
