Yolande SPITERI
9 ta' Marzu, 2010
18:00 CET |
Thea Garrett, li f'Mejju li ġej se tirrappreżenta pajjiżna fil-55 edizzjoni tal-Eurovision Song Contest f'Oslo fin-Norveġja, it-Tlieta filgħodu telqet lejn il-Ġermanja sabiex tagħmel il-mastering tal-kanzunetta tagħha My Dream - proċess intiż li jtejjeb l-prodott mużikali tas-silta rebbieħa tal-festival tal-Maltasong.
Waqt din iż-żjara, hi se tkun qed tirrekordja mill-ġdid partijiet mużikali u vokali tal-kanzunetta tagħha, bl-użu ta' strumenti live sabiex is-silta tkun waħda aktar raffinata. Minbarra dan qed ikomplu t-tħejijiet u l-promozzjoni mad-diversi pajjiżi li se jieħdu sehem f'din il-kompetizzjoni. Iktar tard dan ix-xahar il-kapijiet tad-delegazzjonijiet ta' kull pajjiż li se jieħu ħsieb f'din il-kompetizzjoni se jiltaqgħu f'Oslo u minn hemmhekk, fissret Thea, jibdew l-prepraramenti għal-lejl tas-semi finali.
Malta tkun tista' tieħu sehem fil-finali tal-Eurovision jekk tgħaddi mill-fażi tas-semi-finali li se ssir fil-25 ta' Mejju meta se tkanta fid-9 post.
|
